Home Politics Segun Abigaél Arends di partido AVP: Politica E ARTE DI COMBERSA Y...

Segun Abigaél Arends di partido AVP: Politica E ARTE DI COMBERSA Y COMPRONDE OTRO

SHARE

 

E arte di combersa na nivel ta rekeri di hopi. Ora cu nos ta papia di stakeholders, nos ta papia di cada instancia, companía, departamento, fundacion,etc., sea ta gubernamental of priva y individuonan cu ta comparti un of mas interes comun di un pais. 

Asina tambe cada individuo, habitante di un pais por ta stakeholder den multiple instante. Por ehempel un habitante cu ta haci uso di awa corriente y telefoon ta un stakeholder di WEB, ELMAR y SETAR semper e tin derecho pa expresa libremente su opinion riba funcionamento di un of tur e companianan aki. Opinion di stakeholder ta hopi importante pa cada instancia identifica y implementa su direccion di funciona.

Ora bo ta biba na un pais bo ta parti di un comunidad hunto cu tur otro habitante di e pais ey. Bo tambe tin un responsabilidad p acu bienestar di bo pais. E Bon Comun ta sobresali ora tur habitante- stakeholder- di e pais ta desea e  mihor di su pais en general.

E periodo cu nos a pasa, y ta pasando aden -e crisis economico-  ta uno fuerte pa hopi hende, pero e la siña nos pa asina skucha otro mihor, spaar pa temponan dificil, traha cu cu presupuesto, e la cambia nos bida pa uno mas responsabel. E la siña nos tambe pa nos pensa con esnan di mas recurso ta sinti esaki. Imaginabo awor esnan di menos recurso cu no tin nada, no tin manera, no tin guia. Hopi biaha nos ta kere cu nos pais ta bon, mientras den hopi bario y cas cu no tin coriente ni awa, hendenan cu no tin cuminda mes, pero ta asumi e responsabilidad pa yuda otro. No ignora nos realidad. Nos tin pobresa y nos manera di por sali for di esaki ta si nos traha hunto. 

Otro problema grandi cu nos tin ta, combersa y por compronde otro. Hopi di nos ta kere nos ta compronde otro pero ora yega e momento di ehecuta, lo ripara si a compronde otro bon of no suficientemente cla. Con nos ta soluciona esaki?  Ripiti loke bo a compronde den bo palabranan pa asina por siña conoce con e otro persona a compronde prome cu haci e tarea.

Nos tin hendenan inteligente cu hopi conocimiento den varios area, y na momento cu bo ta splikando algo kisas nan no por compronde di bo manera pero si na nan manera. Por ehempel algun sabio of tambe algun genio lo compronde diferente. Cu un bon dialogo bo ta soluciona e situashon aki. Nan ta mihor hende cu otro? NO. Un Academico ta mihor cu un persona cu tin experiencia pero no studia? NO. Un persona cu ta barido di caya ta mihor cu un persona cu ta haci limpiesa den cas? NO.  Ora e la ehecuta tur su bida sea den gobierno of pa hiba su pais dilanti den cualkier compania priva, esaki nifica cu ora e ta penshonado e no ta di gran balor mas? NO.

Nos tur tin cu siña tin respet pa otro, reconoce e persona pa ken e ta, kiko ta su estudio, su experiencia, Sea muher of homber nos tur merece trata otro cu respet. Respet tambe kiermen, no comete actonan di abuso, actonan indirectamente of directamente cu ta atake contra un of mas persona. Si nos ta desea di duna ehempel na otro, nos tin cu mira den spiel prome, analisa nos mes y cuminsa cambia internamente, si ta necesario. Esnan den politica ta esnan cu dia y anochi ta traha pa un pais, respeta nan, respeta nan cas, respeta nan famia. Cuanto hende diariamente ta bati na nan porta pa ayudo pa soluciona un of otro problema. Hopi biaha esaki ta keda resolve tambe. 

 

Abigaél Arends – Personal Coach, Corporate Development & Communications Specialist