Home Politics Minister di Cultura Xiomara Maduro: Muchanan di Anglo Kleuterschool a bishita...

Minister di Cultura Xiomara Maduro: Muchanan di Anglo Kleuterschool a bishita Museo Archeologico Nacional di Aruba

SHARE

 

En conexion cu Dia Internacional di Museo

 

Oranjestad – Diaranson 18 di mei, tur museo di tur Pais ta celebra Dia Internacional di Museo.

Riba e dia aki ta concientisa comunidad riba e importancia di museo y e retonan cu esakinan tin. Gobierno di Aruba a invita un klas di Anglo Kleuterschool pa bishita nos Museo Archeologico Nacional di Aruba (M.A.N.A.), pa asina for di un edad jong nan compronde e importancia di un museo.

 

Minister President Evelyn Wever-Croes y Minister Xiomara Maduro tambe tabata presente y a presencia con e muchanan a disfruta di nan bishita na e museo y a siña hopi di nos historia.

E muchanan a haya un recorido den MANA pa asina nan por a mira con nos antepasadonan tabata biba y kico tabata nan custumber. Tambe e muchanan a wak e video ‘Rais di nos Pais’ y haya un stempel pa asina conmemora nan bishita na MANA.

 

Minister di Cultura ta subraya cu ta hopi importante pa concientisa e importancia di un museo for di mucha. Pa asina nan siña di nos antepasadonan y tin e instrumentonan necesario pa yega na ideanan nobo pa nos tin un miho futuro. 

 

Minister Xiomara Maduro ta gradici juffrouw Johaddis Jong, juffrouw Poppy Casiano y e stagieres Dayana Castellanos, Jennesee de Cuba y Angie Ramirez pa por a bin bishita MANA cu e muchanan. Tambe Minister di Cultura a gradici e director interino di MANA, sr. Pancho Geerman pa por a haci e bishita aki posibel. Un danki tambe na sra. Marguerita Wever, sra. Suzy Boekhoudt, sra. Karin Drost di MANA cu a sa di entretene e muchanan, splica nan y contanan storia di nos antepasadonan. Na final e muchanan a haya un ‘kleurplaatje’ di MANA pa bay pinta y un treat di parti di Gobierno di Aruba.

 

Minister Xiomara Maduro a yama e personal di MANA pabien riba nan dia special. E personal di MANA a disfruta di e Dia Internacional di Museo hunto cu e muchanan di Anglo Kleuterschool.