Home » Aruba Tourism Authority a haci entrega di su Rapport Anual di 2021 na Minister di Turismo

Aruba Tourism Authority a haci entrega di su Rapport Anual di 2021 na Minister di Turismo

by Admin
0 comment 98 views

 

 

Diaranson dia 18 di mei, 2022 a tuma luga e entrega oficial di e Rapport Anual pa aña 2021 na Minister di Turismo; Danguillaume Oduber. E entrega a wordo efectua den presencia di Presidente di Hunta di Supervision di A.T.A. conhuntamente cu algun miembro di e Hunta, CEO di Aruba Tourism Authority Ronella Croes, algun miembro di e ekipo di A.T.A. y representantenan di oficina di e firma di accounting encarga cu e auditoria; Grant Thornton. 

 

Esaki ta bira e di diesun (11) entrega di Rapport Anual di A.T.A., unda cu for di 2011 por bisa cu orguyo cu tur aña A.T.A. a sa di cumpli debidamente cu entrega di esaki, incluyendo resumen di resultadonan y di trabao haci, como tambe e relato financiero cu su respectivo ‘goedkeurende verklaring.’ 

 

Conforme e ley di A.T.A., tur aña tin 2 momento importante, e prome ta ora di entrega e Rapport Anual cu e resultadonan di e aña anterior y e di dos ta ora di haci entrega di e presupuesto pa e aña siguiente. 

 

Tur aña, prome cu Minister aproba e rapport, esaki ta wordo manda pa parlamento di Aruba ‘ter inzage’ pa 10 dia di trabao. Despues di pone disponibel na parlamento, Minister di Turismo por duna su aprobacion formal pa cu e Rapport Anual di A.T.A.

 

E enfasis di e maneho financiero di A.T.A. ta sumamente importante. Ta enfoca pa traha riba un maneho conforme ley aplicabel pa A.T.A., como tambe conforme locual ta constitui ‘Good Corporate Governance’. E pasonan aki como tal ta refleho di un maneho cu ‘Checks & Balances’ adecua unda A.T.A. ta entre otro wordo audita door di companianan independiente, conforme reglanan internacional.

 

E ekipo completo di A.T.A. ta wordo felicita pa nan trabao y pa e logro aki di por entrega un biaha mas un rapport cu un ‘goedkeurende verklaring’. Tambe ta gradici Hunta di Supervision, kende a duna prioridad un biaha mas na e rapport importante aki pa A.T.A. y pa bienestar di nos sector turistico. Ademas ta gradici Grant Thornton y mas cu claro ta gradici Minister di Turismo pa e diligencia necesario cu lo ser duna na revision y aprobacion di e documento aki.

 

Despues cu e Rapport Anual di 2020 tawata hopi diferente for di añanan anterior mester bisa cu e Rapport Anual di 2021 a surpasa e expectativanan y proyeccionan pa 2021, algo sumamente positivo. A.T.A. a continua cu e esfuersonan di recuperacion economico den 2021 y lo sigui cu esaki den 2022. 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio