Home Politics Parlamentario Ricky Hoek (MEP): Actividad Dia di Famia exitoso

Parlamentario Ricky Hoek (MEP): Actividad Dia di Famia exitoso

SHARE

 

 

Tur aña riba 15 di mei, mundialmente ta conmemora Dia di Famia. Den cuadro di e dia special aki, Centro pa Hoben y Famia cohunto cu Fundacion Contra Violencia Relacional, Fundacion Maneho di Adiccion, HIAS, Fundacion Respeta Mi, Wit Gele Kruis, CEDEHM, ADRA, Telefon pa Hubentud, Tienda di Educacion, FADA y Famia Planea a tene un actividad pa henter famia. E actividad a tuma luga na Centro di Bario Playa Pabou y a consisti di mercado di informacion, diferente charla, pustamento di fli y baile di nos mucha- y hobennan. 

 

E importancia di Dia di Famia?

E meta principal di Dia di Famia ta pa crea conciencia riba e beneficionan di e systema di famia. Awendia nos ca cu e constelacion di famia a haya mas cu e forma traditional cu semper nos a conoce. Sinembargo, e instituto famia ta keda sumamente importante pa cada miembro di e famia, sea cu e por ta un yiu, un mayor, un ruman, etc. Algun bentaha di ta forma parti di un famia ta cu e famia ta fortifica bo sentidonan di felicidad y satisfaccion. Estudionan a demostra cu pasa tempo den famia ta reduci stress y anciedad, ta conduci na un estilo di bida mas saludabel y ta laga bo biba mas largo. Famia ta dunabo motivacion pa bo ta e miho version di bo mes. 

 

Kico ta e rol di fraccion di MEP y mi persona den Parlamento? 

Un luna pasa, Comision Fiho di asunto social di parlamento a haya un rondleiding den y presentacion na Centro di Hoben y Famia, caminda a mustra tur e trabounan cu ta keda haci entre diferente instancia y con e centro ta funcionando. Debi na situacionnan social cu mester di mas atencion, nos ta encurasha tur persona cu mester di un ayudo pa nan yiu, pa mayornan of un conseho, pa libremente pasa na Centro pa Hoben y Famia, caminda un profesional lo atende bo. Tambe sa tin charlanan interesante cu ta duna hobennan, mayornan y educadornan tips con pa atende cu e situacion na un manera cu tur dos partido ta sali gana. 

 

Un palabra di felicitacion na Centro pa Hoben y Famia y tur cu a colabra cohuntamente pa haci e dia aki uno exitoso y yega asina mes cerca di e habitantenan den bario.