Macubaristraat, Tarabana:Diahuebs algo despues di 3’or y mey di atardi, por a mira un caravana di autonan di team di aresto para dilanti un cas den Macubaristraat. E adres aki ta uno cu den pasado a yega di wordo bishita caba pa autoridad.
Team di aresto a para e autonan riba caminda blokeando e caminda pa asina nan efectua e entrada hudicial. E Team a drenta prome den e cas y a detene un persona masculino hoben. Despues un recherche den compania di dos agente policial a yega na e cas y a bay paden.
Team di aresto a transporta e sospechoso, mientras cu e recherche y e dos agentenan a sali di e cas cu un saco, cu probablemente lo ta contene articulonan confisca y cu lo por ta di balor pa e investigacion. Den casonan asina ‘ki, e procedura normal ta cu autoridad ta confisca celular, laptop of otro articulonan cu lo por tin cualke informacion cu por ta valioso pa e investigacion.
Ora e recherche cu e dos polisnan a sali for di e cas, nan a entrega un persona na e cas un papel y a sigui pa e siguiente entradanan hudicial.