Home Politics Minister Dangui Oduber a hiba palabra na e “Vacation Rental Professionals Summit”...

Minister Dangui Oduber a hiba palabra na e “Vacation Rental Professionals Summit” 2022

SHARE

 

ORANJESTAD – Diaranson mainta Minister di Turismo sr. Dangui Oduber a duna un discurso na e “Vacation Rental Professionals Summit” (VRPS) 2022 cu a tuma lugar na Azure Owner’s Lounge. Den e VRPS aki e mandatario a ricibi informacionnan concreto riba e potencialnan y oportunidadnan cu tin den e industria di “Vacation Rental” na Aruba. 

Minister Oduber a trece dilanti cu den e ultimo decada e industria di turismo a experencia varios shift y cambio y den esey e evolucion di e industria di “Vacation Rental”. Por a mira un cresemento den “Vacation Rental” caminda tin hopi mas variedad di e opcionnan cu ta keda ofrece na nos bishitantenan. Tin algo pa tur tipo di viahero segun e mandatario.

Turismo ta sigui crese y aña 2022 ta mustra hopi bon, indicadornan ta mustra cu 2022 ta bay sera cu un 95% di recuperacion den comparacion cu aña 2019 di “stay over visitors”. Gobierno di Aruba ta na altura cu e segmento di acomodacion aki ta un parti integral di e producto cu Aruba ta ofrece. Pa e motibo aki e segmento di “Vacation Rental” mester wordo sosteni, salvaguardia y desaroya debidamente. E ta un portunidad pa diversifica e producto y ofrece un experencia diferente na nos bishitantenan, atendiendo asina e turismo niche.

Segun e cifranan ricibi den VRPS, den aña 2021 “Vacation Rental” a trece di manera directo den nos economia un total di $248.6 miyon dollar. Di esaki $59.8 miyon dollar a wordo rigistra den e parti di acomodacion y 65.9 miyon a keda rigistra bou di food & beverage. Indirectamente e industria di “Vacation Rental“a trece den aña 2021 un total di $478.7 miyon dollar den Aruba su economia. Minister Oduber a menciona cu pa Gobierno di Aruba e enfoke principal ta pa asegura pa tin igualdad den e condicionnan. Tur Hotel, Vacation Rentals, Apartament mester opera conforme e ley y reglanan, incluiendo pagamento di tur e impuestonan manera e room tax y milieuheffing. Gobierno ta desea di haya su fair share di impuesto di e sector di vacation rentals. 

Nos ta aprecia e sector aki y a traves di e legislacion di e zona nan di Aruba, Gobierno ta bay purba garantiza cu e ofrecemento di acomodacionnan aki por co-existi cu e area residencialnan di manera solido. Pa semper tene consideracion di tin un comunidadnan feliz consistiendo di bishitante y recidente.

Minister Dangui Oduber ta gradici Vacation Rental Professionals Association (VRPA), Aruba Tourism Authority (ATA) y Aruba Hotel and Tourism Association (AHATA) pa nan iniciativa pa haci un estudio riba e impacto economico y pa crea mas dialogo over di Vacation Rental.