Fundacion Tienda di Educacion ta cumpli 10 aña di existencia riba 18 di mei 2022. Desde su inicio Tienda di Educacion tin e meta pa yuda mayornan y educadornan na tal forma cu nan habilidad pa soluciona problema di educacion di nan yiu, ta mehora. Pues e meta ta pa e grupo aki haya guia y sosten con pa amplia nan capacidad pa busca solucion.
A cuminsa cu e servicio telefonico di 161 desde 2012 pa duna mayornan y educadornan e oportunidad di yama pa un conseho, sosten y guia sin tin mester di un cita. Otro servicio cu Tienda di Educacion a bin ta ofrece ta tayer pa e grupo meta, conscientisa comunidad riba diferente aspecto di lantamento di mucha, atende cliente cu un consulta personal y tambe forma parti di diferente comision cu tin e focus riba bienestar di nos muchanan. Pa e profesional of studiante tambe Tienda di Educacion tin un significacion importante. Un profesional tambe por acudi cu pregunta na e organisacion. Studiantenan tin un oportunidad pa stage y asina siña conoce e trabow cu Fundacion Tienda di Educacion a bin ta eherce.
Pa por conmemora e di dos lustro di Fundacion Tienda di Educacion un serie di 29 video a wordo prepara pa asina cualkier persona cu interes den e tema di lantamento di mucha por tin acceso na e informacion na cualkier momento di dia. Esakinan lo ta disponibel riba nos YouTube Channel y lo wordo comparti riba nos social media entrante 18 di mei 2022. Tur siman un otro video lo wordo publica di cual e ultimo na final di november. E serie completo lo keda disponibel riba nos social media. Nos lo tin un mediatour den e siman di nos aniversario pa asina informa comunidad di serie aki y tambe informa tocante nos servicionan.
Tin varios trayecto cu Fundacion Tienda di Educacion ta colabora cu otro instancianan den e ramo social. Asina e organisacion tin lasonan estrecho cu por ehempel: Fundacion Telefon Pa Hubentud, Fundacion Pa Nos Muchanan, Fundacion Respeta Mi, Centro Pa Hoben y Famia, Wit Gele Kruis Aruba, Fundacion Anti Droga Aruba, Departamento di Asunto Social, Directie Voogdijraad, Buro Sostene Mi, Fundacion Guia Mi y tambe diferente scol. Fundacion Tienda di Educacion ta forma parti di e Comision Pedagogico di Aruba.
Fundacion Tienda di Educacion den su trayectorio a ofrece un total di 350 tayer na e comunidad di Aruba desde su inicio. Tambe a brinda consulta via yamada na mas cu 3000 occasion. No obstante cu Tienda di Educacion ta consisti di solamente 3 empleado e organisacion a sa di brinda tur su servicionan cu dedicacion, pasion y experticio. Tienda di Educacion ta situa den edificio di Centro Pa Hoben y Famia, Sabana Blanco 68-C. Orario di servicio ta di 8 am – 6 pm. Por contact Tienda di Educacion di dialuna pa diabierna via 161, Facebook Messenger of e-mail [email protected]. Pa keda informa like y follow nos Facebook & Instagram Page. Bishita tambe nos Website y YouTube Channel pa mas informacion.
Tienda di Educacion ta duna un danki di curason na e boluntarionan di e Directiva, na tur organisacion cu ta colabora di cerca cu nan, na tur studiante cu a stage, na prensa cu semper t’ey pa nos y tambe specialmente na e comunidad di Aruba pa e confiansa brinda na nos organisacion.