Home Local Accion na Diamonds International diahuebs mainta

Accion na Diamonds International diahuebs mainta

SHARE
Diahuebs mainta, 12 di Mei 2022, Federacion di Trahadornan di Aruba (FTA) a yama un accion di protesta na Diamonds International.
Motibo di e accion aki ta cu despues cu dia 28 di April ultimo FTA a gana referendum pa representa e empleadonan den nan asuntonan laboral, e empresa a scohe pa pone presion riba esnan cu a afilia na sindicato na lugar di bai mesa y negocia solucionnan na e problema an existente cu esnan cu e empleadonan a designa como nan representante.
FTA ta lamenta y condena e tipo di actitud aki. Derecho di afiliacion sindical ta un derecho constitucional pa tur cu ta biba na nos isla. No por ta posibel cu empresa y/of empresarionan ta scohe pa trapa riba derechonan di trahador y leynan di Aruba.
Algo prome cu 10’or di mainta sano nuicio a prevalece y representacion di gerencia a tuma contacto cu FTA y a propone un reunion cu sindicato pa trata e situacion di e empleadonan. Esaki a wordo acorda pa tuma lugar dia 23 di Mei proximo, 9or mainta, pa asina duna espacio pa representantenan internacional di Diamonds Intl. por ta presente. A acorda tambe cu no lo tuma represaya contra esnan cu a participa na e accion di protesta di awe mainta.
Despues di esaki FTA a finalisa e accion y a pidi tur miembro pa reanuda nan trabaonan, locual a sosode tambe.
FTA ta gradece su miembronan pa a sostene e protesta di awe mainta y pa pone nan confiansa den nos organizacion pa defende nan derechonan laboral.
Den UNION tin FORSA