Homber cu tabata deteni pa Douane recherche a huy for di nan man dilanti aiport, despues di mas cu un ora di buskeda pa logra gar’e pariba di e dam di Santa Martha.
Santa Marta – Arubaanse Wegenbouw
Dialuna atardi na airport, Douane Recherche riba un tip a logra pone man riba e homber Jozef Ridderstaat pa traficacion di droga. E la wordo deteni y na momento cu e lo mester a wordo transporta di un of otro manera e la logra huy for di man di Douane Recherche.
Esaki a sosode den careda di 6 or y mey di atardi. Mesora Douane recherche a pidi asistencia di polis pa yudanan busca e fugitivo Jozef Ridderstaat.
Asina a start un buskeda den area di Wayaca, unidad di K9, varios patruya di polis, varios unidadnan di Douane, entre otro K9 di Douane. Helicopter di polis tambe a lanta pa yuda busca.
Varios persona den wayaca y becindario a mira Ridderstaat canando y a avisa e polisnan cu tabata coriendo rond buscando Ridderstaat. E la wordo mira banda di Animal Shelter, banda di post di ambulance y despues den dam di Santa Martha.
Un polis na civil cu ta biba den cercania di e dam a sali yuda su coleganan y asina nan a bin detene Jozef Ridderstaat.
Transportwagen di Polis mesora a wordo pidi pa transport’e pa Warda di polis.
