Home Local Ex Minister di AVP y POR Sr. Otmar Oduber “e berdad...

Ex Minister di AVP y POR Sr. Otmar Oduber “e berdad semper lo vence e maldad” Su declaracion subiendo van di C.E.A.

SHARE

Vondellaan, Oranjestad:
Diamars den careda di 6 or y 40 di atardi abogado mr. Vito Carlo a sali for di oficina di Landsrecherche, nos por a compronde cu Oduber a keda deteni pa interogacion.

Transportwagen di C.E.A.
Den careda di 6 or y 50 di atardi e transportwagen di C.E.A. a bin busca Sr. Oduber, pa asina hibe na un warda di polis caminda e lo pasa su anochi den un cel y mas sigur diaranson mainta e lo mester bolbe presenta pa sigui cu e interogacion. Na momento cu Sr. Oduber tabata subiendo e van di C.E.A. e la bisa ” e berdad semper lo vence e maldad.”

Ex Minister di AVP y POR
Sr. Oduber a cuminsa un carera politico cu hopi exito, como candidato riba lista di partido AVP, e tabata gpsa di un gran popularidad, durante elecion na 2009, Otmar a logra saca su mes grandemente riba lista di AVP y a bira Minister. Na final di 2016 e tabata tin un desacuerdo grandi cu e partido y a tuma su retiro como Minister y tambe como candidato di AVP.

2017 a lanta partido POR

Na 2017 Otmar Oduber a lanta su propio partido, cual tabata partido POR y durante elecion 2017 e la logra saca dos asiento y asina a forma un coalicion cu partido M.E.P. y RED. Un biaha mas Otmar Oduber a bira minister, pero na 2019 pa un of otro motibo e la tuma su retiro como Minister y despues como politico tame.

Tres ex Minister como sospechoso principal den casonan grandi
Actualmente tin tres caso grandi den cual ex ministernan ta sospechosonan principal
Caso Ibis, den cual ex Minister Paul Croes, di partido AVP a wordo condena y tin un castigo di prison colga riba su cabes, pero a bay cassatie y ta wardando.

Caso Avestruz den corte
Caso Avestruz e sospechoso principal ta Ex Minister Benny Sevinger y actual parlamentario di partido AVP. Caso Avestruz actualmente ta wordo trata den corte. Sevinger ta wordo acusa di falsificacion, estafa, tumamento di regalo of promesa, labamento di placa y abuso di su funcion, den e lunanan nos dilanti e lo por haya su sentencia.

Caso Flamingo bou investigacion
Caso Flamingo cu actualmente ta bou investigacion, cu ex Minister Otmar Oduber aparentemente ta e sospechoso principal. Oduber tambe tabata un minister di partido AVP entre 2009 pa 2016 y di 2017 pa 2019 Minister di partido POR. Caso Flamingo ta relaciona cu iregularidadnan den otorgamento di terenonan erfpacht, data di 2017-2019.

E investigacion relaciona cu Caso Flamingo ta den full swing y no ta descarta cu den e dianan of simannan nos dilanti mas detencion lo por cay.

Ministerio Publico lo dicidi
Sr. Otmar Oduber a wordo deteni relaciona cu e investigacion di Caso Flamingo, te ora cu autoridad caba di interoga su persona e lo wordo laga den libertad pendiente su caso den corte. E interogacionnan lo por dura un of mas dia, algun siman of te hasta algun luna, manera tabata e caso den Caso Avestruz di ex Minister di AVP, Benny Sevinger kende a keda algun luna cera. E decision aki ta den man di Ministerio Publico, nan lo dicidi pa cuanto tempo un sospechoso lo keda deteni pa interogacion.