Ta prepara pa presenta e presupuesto na tempo na Parlamento
ORANJESTAD – E siman aki Minister di Finansa a presenta Presupuesto 2023 na Conseho di Minister pa asina por tuma algun decision importante pa despues e presupuesto por cuminsa cana su caminda formal. Tur preparacion ta wordo haci pa asina por entrega e presupuesto na tempo na Parlamento, esta promer cu 1 di september.
Meibrief
Ya caba den luna di maart, tur departamento di Gobierno mester entrega nan informacion financiero na Departamento di Finansa pa asina por compila esaki y hinca esaki den un cuadro financiero den cual mester tene cuenta cu palabracionnan cu a wordo haci pa cu, entre otro, supervision financiero di CAFT. E cuadro financiero aki ta bira e presupuesto preliminar cu ta bay den forma di un carta yama ‘Meibrief’ di Minister di Finansa dirigi na Conseho di Minister. Den e carta aki ta indica cual decisionnan ta necesario pa e ministernan tuma pa asina por finalisa e concepto di e presupuesto. Aki ta trata di decision riba, por ehempel, prioridad di proyectonan, recorte nesesario den nivel di gasto di servicio y producto, evaluacion di vacatura y decision riba inversion cu lo wordo haci. E decisionnan riba e puntonan den e ‘Meibrief,’ ta completa e cuadro financiero cu despues ta bay Departamento di Legislacion pa haya su bachi huridico como concepto di Ley di Presupuesto.
Trayecto pa formalisa presupuestoÂ
Promer cu e concepto di e Ley di Presupuesto keda finalisa, esaki ta wordo manda pa CAFT por duna nan opinion preliminar riba e Presupuesto pa despues Gobierno haci e cambionan necesario den e concepto di Presupuesto. Despues e concepto ta wordo manda pa Raad van Advies duna su conseho y asina cu e conseho aki ta cla, Gobierno ta haci e cambionan necesario y ta brinda e concepto di Presupuesto na Parlamento. Tur esfuerso ta wordo haci pa asina na fin di augustus Minister di Finansa por entrega e concepto di Presupuesto 2023 na Parlamento di Aruba. Si tur cos cana bon, e debate den Parlamento lo por tuma lugar den e ultimo 3 luna di aña 2022 y e Presupuesto 2023 lo por keda aproba fin di december 2022. Despues cu Gobernador firma e Presupuesto 2023, esaki ta bay pa keda publica den Landscourant pa por drenta na vigor na comienso di aña 2023.
