Home Politics Parlamentario Setty Christiaans-Yarzagaray (MEP): E palabra consenso ta keda cuestionabel pa...

Parlamentario Setty Christiaans-Yarzagaray (MEP): E palabra consenso ta keda cuestionabel pa tur 3 isla pa locual ta trata COHO y Ley di Consenso

SHARE

 

 

Diaranson reunionnan di e delegacion di Aruba na IPKO a continua. Ariba e dia aki Parlamentarionan di tur pais di Reino Hulandes tawata presente y despues cu cada pais por a presenta en corto e ultimo desaroyonan di nan pais, a sigui cu un presentacion tecnico tocante e concepto di ley na nivel di Reino COHO (Caribisch orgaan voo hervorming en ontwikkeling). Tawata tin oportunidad limita pa haci pregunta na unda representantenan di e diferente paisnan cu tawata envolvi den e proceso tambe tawata presente na un forma virtual. 

 

Despues di e presentacion tecnico tur miembro di e reunion a wordo parti den 4 diferente grupo na unda a brinda e oportunidad di intercambio riba e informacion presenta of relaciona cu e topico. A parti den grupo mas chikito pa asina por dialoga mas efectivo y crea mas oportunidad pa mas punto wordo treci dilanti. Aki representantenan di islanan ta haya e oportunidad pa comunica y intercambia cu representantenan di Reino nan respectivo puntonan di preocupacion riba e concepto di ley di COHO. 

 

Den e grupo di Parlamentario Christiaans-Yarzagaray e miembronan di Tweedekamer tawata hopi habri y a sugeri alabes pa papia habri cu nan pa asina nan por tin miho informacion di nos pensamentonan pa cu e ley di COHO. Apesar cu cada isla di Reino Hulandes cada un a trece puntonan diferente dilanti, un aspecto cu nos tur tres tin en comun ta cu niun Parlamentario di e diferente paisnan tawata di acuerdo cu algun parti di e contenido di e ley. Mas a leu ainda, varios miembro incluyendo Aruba ta cuestiona pakico mester reglamenta puntonan di uitvoeringsagenda den un ley na nivel di Reino. 

 

Diferente opcion ta bezig ta wordo analisa pa cada pais pero entre tanto aworaki di parti di Aruba y nos fraccion a dicidi cu lo bay sigui cu e proceso cu e ley tin cu encamina y purba di cumpli cu e fecha cu cada pais tin pa entrega pregunta riba e ley cu ta wordo yama e verslag. Dependiendo kico ta e contestacion ricibi riba preguntanan y comentarionan, Aruba y nos fraccion lo tuma e decision con pa sigui di eynan. En todo caso na e momentonan aki un mayoria hopi amplio, incluyendo Parlamento di Aruba, no ta di acuerdo cu e ley di COHO manera e ta.