Home » ‘PIA ABOU’, LIBERA PA CONECTA TA DUNA E PROME STAP PA KITA SAPATO Y DRENTA DEN UN PERIODO INDEFINI DI BUSKEDA Y DESCUBRIMENTO REAL CU NOS NATURALESA Y MAMA TERA

‘PIA ABOU’, LIBERA PA CONECTA TA DUNA E PROME STAP PA KITA SAPATO Y DRENTA DEN UN PERIODO INDEFINI DI BUSKEDA Y DESCUBRIMENTO REAL CU NOS NATURALESA Y MAMA TERA

by Admin
0 comment 99 views

Oranjestad – Departamento di Cultura Aruba (DCA) cu su proyecto multidisciplinario aki riba tereno artistico ta trece un experiencia unico. Haciendo uzo di e oportunidad pa concilia y lansa e proyecto, dunando e prome stap pa kita sapato y drenta den un periodo indefini di buskeda y descubrimento real cu nos naturalesa y mama tera tin di ofrece nos.

E idea tras di e proyecto ta pa cuminsa inmediatamente despues di e acto simbolico cu e elaboracion di un documentario pa presenta durante di e Film Festival cu lo ta dedica na e practica di diferente cunukero, piscado, artista, remedi di tera, medico y di otro profesion pa amplia mas e concepto.

Pa finalmente por traha riba un presentacion multidiscipliario, cu’n publicacion cu tur sabiduria acumula durante di e caminda cu diferente anecdota, poema y relato fotografico. Finalisando cu’n exposicion cu tur resultado acumula durante di e caminda y trayecto di investigacion.

Durante di e proceso di elaboracion lo acerca diferente instancia y artista entre otro: Fundacion Rancho, Proyecto Caricia, Proyecto Much’i Mondi, Museo Arqueologico Nacional Aruba, Parke Nacional Arikok, Aruba Aloe N.V. y Aruba Art Fair; p’asina traha mas den cooperacion y fortalece lasonan estrecho di e trabao den un colaboracion mas estrecho posibel cu por yuda nos yega na un resultado mas completo y asombroso.

Esaki t’e prome paso y lo marca e inicio di e ruta di e caminda cu hunto nos ta inicia y cu sigur lo hiba nos na un resultado masha poderoso, mirando cu nos tin e fortuna di biba den un isla asina bendiciona, cu tanto rikesa y potencial natural pa explora.

Duna halanan na nos pianan, pone un rato nos sapato un banda y laganan descansa, cu nos plant’i pia, duna sunchi na nos suela, laga lastronan di grandesa, noblesa, puresa, sensibilidad y bondad.

Liberando nos di tur peso cu tin biaha nos ta carga, cu ta stroba nos pa realmente conecta. Pa permiti nos mes topa cu otro y sinti e placer di drenta den accion directo, humano y natural.

Nos di DCA ta invita tur instancia, artista, persona y of organisacion cu ta desea di uni y forma parti di e proyecto aki pa comparti cu nos tur experiencia personal cu den bida y trabao ta conecta cu nos naturalesa y ta haci di e practica aki uno diario.

DCA ta desea pa libremente nan por uni nan mes na e experiencia aki, pa na final nos por tin algo di conta y comparti cu otro, di tur loke e practica aki a brinda nos.

Sr. Jhon Freddy T. Montoya, como lider di proyecto lo cana den e trayecto cu mente fiho y enfoca riba e meta y lo haci cu responsabilidad y lo ta hopi cauteloso durante e experiencia aki. Cu esaki por ta uno hopi agradabel den bista di otro y pa tene su mes na tur regla (protocol) cu tin biaha, bida y sistema mes ta mara nos, ta pone cu nos mester cumpli cu nan. E lo ta tolerante y sensibel durante di e proceso aki. Sin perde e derecho y libertad cu como artista nos tin pa expresa.

Keda pendiente p’e lansamento di e video promocional di proyecto. Esaki lo ser presenta den tur plataforma y medio di comunicacion y social riba diabierna dia 6 di Mei proximo.

Tambe e campaña di invitacion pa participacion di nos comunidad den e proyecto riba diabierna 13 di Mei 2022 venidero.

E ekipo di e proyecto aki ta expresa palabra di danki na henter Departamento di Cultura Aruba, drs Siegfried Dumfries, director di DCA, John F. Kennedy Education Center, drs. C. P. J. Auwerda, Stanley Dabian, Michael Arends, Lupita Bernabela, Roland Jansen, Adriana Kozlov, Marilis Becker, Semi Chahmi y Chahmi Film Studio, Sergio Tjie Aloi, Michael Paesch, Fatme Rigaud, Gloria Bryce, Natusha Croes, Joan Danies, Henry Lourens Oduber, Roland Helder y Roberto Loefstop, pa tur sosten brinda durante di e realisacion di e lansamento di e proyecto grandioso aki.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio