Home Politics Mensahe riba Dia di Labor TUR LABOR TIN SU BALOR

Mensahe riba Dia di Labor TUR LABOR TIN SU BALOR

SHARE

Reflexionando riba un dia asina importante, riba e crisis cu nos Pais a pasa aden a causa di e pandemia, con dos aña despues nos ta recuperando cu pasonan grandi, ta danki na e sacrificio cu nos como pueblo y pais a haci pa e meta comun pa salvaguardia e vivencia di tur.

 

Bo balor

Realisa cu sin bo labor, Aruba no ta draai. Bo trabou, bo entrega di tur dia, bo pasion cu cual bo ta hacie, ta crea e energia y sinergia pa e compania draai, economia lora, Aruba progresa y crea stabilidad pa tur.

 

No tin un trabou cu no ta balioso ni importante. 

Cuminsando na esun cu ta chapi cura, manteniendo bo entorno limpi;

Na esun cu ta recoge desperdicio tur dia manteniendo hygiene den bario;

Na esun cu ta haci limpiesa cant’i caminda sino nos Pais lo ta azota di sushi, te na e housekeeper pa por acomoda nos turistanan y yama nan bon bini cordialmente; un ama di cas cu ta cuida su hogar,  un telefonista cu ta e bos y cara di un empresa, na e bendedonan cu ta haci e negoshi prospera, te na e CEO di un compania….tur labor tin su balor. Tur hunto, e combinacion di tur trabou, trahando en conhunto, ta crea e exito personal y profesional.

 

Na e dunadonan di trabou, realisa y reconoce bo empleado cu e trato y recompensa husto pasobra sin nan no tin nada.

 

Na e trahado, realisa cu bo aporte tur dia ta balioso pa sigura bo trabou, pa existencia di unda bo ta traha, te na recuperacion di nos Pais. E energia cu bo ta hinca tur dia den bo trabou lo manifesta su mes den recuperacion di nos Pais, lo manifesta su mes den bo bida personal.

 

Na e empleadonan di e Departamento di Labor: DAO Y DPL

Boso ta fundamental den mantene husticia den mercado laboral. Boso input ta indispensabel. Boso ta e balansa cu nos Pais mester.

 

Reflexion:

E momento cu nos stop di wak pa nos mes so, y cuminsa wak e interes general; e momento cu nos realisa y reconoce cu nos tin e posibilidad y responsabilidad pa por 

 

haci un diferencia den un otro su bida, bo mision ta bira uno mas grandi cu bo mes. Bo vision ta cambia di micro pa macro. Bo aporte y energia lo ta e felicidad di un otro.

 

Ainda tin hopi pa haci, cambionan grandi pa logra. Hunto cu bo so nos por logr’e, cu e combinacion di e esfuerso conhunto di e trahado di mas ‘chikito’ te na e trahado di mas ‘grandi’.

 

“Man na obra. Bo labor tin balor. Aruba mester di nos tur,” ta mensahe di Minister Glenbert Croes riba dia di Labor.