Desde februari 2022 Parlamento ta den un proceso continuo di reunion y preparacion. E leynan di consenso COHO y RAft y Presupuesto di pais Aruba pa aña 2022 a drenta pa tratamento na Parlamento. COHO y Raft a drenta dia 12 y e presupuesto dia 22 di februari 2022.
Sigur inicialmente e atencion a bay mas na e presupuesto di pais Aruba pa aña 2022. Pero cada parlamentario di nos Fraccion a haya e tarea pa cuminsa lesa y analisa e dos leynan di consenso pa nan mes. Asina e presupuesto a keda aproba dia 5 april 2022, nos Fraccion a cuminsa cu sesionnan interno pa repasa COHO y RAFT en conhunto. Tambe ta tumando lugar reunionnan interno den seno di coalicion. Alabes a cuminsa tambe cu reunionnan central den Parlamento. Siman pasa diahuebs 14 di April 2022 nos tabatin un technische briefing di parti expertonan cu a forma parti di e team negoshado di parti Aruba. Ayera 20 di April 2022 a cuminsa cu un ronda di consulta caminda nos a reuni cu lidernan sindical y awe nos ta reuniendo cu gremionan commercial.
E reunionnan aki ta importante mirando cu pa dia 13 di mei Parlamento di Aruba mester manda su preguntanan encuanto e dos leynan aki pa Hulanda y ta importante pa duna atencion tambe na preocupacion y preguntanan di otro stakeholders den e verslag cu nos ta bay manda Hulanda.
Inicialmente nos mester a entrega e preguntanan dia 20 april 2022 pero nos a pidi uitstel te dia 17 di juni sinembargo Hulanda a duna nos 3 siman y algun dia so extra, esta te dia 13 di mei 2022. Esaki sigur ta un presion grandi riba nos liña di tempo y lo tin su impacto pa nos ta debidamente prepara. Pesey toch nos Fraccion ta haya un lastima cu Hulanda no a concede nos un poco mas di tempo. Intencion di Hualnda ta pa trata ambos ley prome cu nan zomerreces cu ta cuminsa na comienso di juli venidero.
Pa termina ta bon pa indica cu lo tin un Tripartiet y IPKO na Sint Maarten riba e dianan 3 pa 6 di mei venidero. Den ambos reunion COHO lo bay keda trata. Ta bon pa pueblo sa cu COHO ta bay conta pa tur 3 isla, y RAft ta pa Aruba so mirando cu e otro dos islanan tin nan supervision financiero ancra desde 2010.