ORANJESTAD – E siman aki Minister Maduro di Finansa ta atende e reunionnan di ‘Spring Meetings’ di Fondo Monetario Internacional (IMF) na Washinghton. Den cuadro di e reunionnan aki, e mandatario a reuni cu e Executive Director pa Reino Hulandes na IMF sr. Paul Hilbers.
Como parti di Reino Hulandes, Aruba a bin ta ricibi hopi sosten di IMF den forma di asistencia tecnico cu ta yuda pa yega na un solucion pa e retonan di nos Pais. Riba e tereno di, por ehempel, maneho presupuestario, gasto di personal, maneho di debe y reforma fiscal, Aruba a ricibi asistencia tecnico importante di IMF. Hunto cu sr Hilbers y su team, Minister Maduro lo sigui tene e contacto necesario cu IMF pa asina Aruba por keda conta cu e yudansa valioso cu IMF ta brindando nos Pais.
Minister Maduro a haci uzo di e oportunidad di por a reuni pa prome biaha den persona cu sr Hilbers, pa entrega un regalo chikito pa asina e director ehecutivo por haci su anotacion y keda pendiente semper di Aruba.