Un auto a cay for di un parkeergarage di 18 meter halto, den e auto tabata tin dos mucha homber hoben di 16 y 19 aña, ambos no a sobrevivi e caida.
Essen, Alemania:
Diadomingo den careda di 7 ‘or y 20 di anochi a sosode un accidente tragico na un parkeergarage na Essen. Un auto Volkswagen Golf, color berde tabata riba e piso mas halto di e parkeergarage y e auto aki a dal contra e railing y a cay for di un haltura di mas o menos 18 meter, e dos ocupantenan di e auto a fayece.
Riba e piso mas ariba di e parkeergarage a keda un buraco grandi na e railing di e rand. Aki tabata unda e auto a pasa y a bay cay. Despues di e caida autoridad a cuminsa cu un investigacion y nan a marca cu geel riba e parkeerplaats con e auto a core prome cu e la cay abou. E auto a cay for di mas o menos 18 meter halto y a cay den banda, na e banda di chauffeur.
Polis ta sospecha cu e auto prome cu e la cay riba e stupie di e parkeergarage, biniendo abou e lo a dal contra un mata grandi y despues a crash riba e stupie.
Segun vocero di polis e accidente a sosode pa motibo di coremento iresponsabel di e chauffeur, segun investigacionnan haci den careda di 7’or y 20 di anochi e chauffeur a perde control cu su auto y a cay for di halto. Tur cos ta mustra cu e accidente fatal aki tin di haber cu coremento duro y iresponsabel riba e parkeerdek mas ariba.
Hopi lihe despues di e crash e team di rescate a yega na e sitio. Brandweer tabata tin e tarea hopi dificil pa libera e dos ocupantenan, nan tabata mal pega den e auto. Na final nan mester a corta e auto completamente pa por a yega na e dos victimanan y pa asina por a sacanan.
Ambos ocupante a wordo reanima y den un estado hopi critico nan a wordo transporta pa hospital, caminda tur dos a fayece na e heridanan serio cu nan a ricibi.
Famia y amigonan di e dos victimanan, e mesun anochi a bay na e sitio unda e accidente a sosode. Un señora probablemente mama di un di e victimanan a sak den otro na momento cu e la mira con e auto a keda, e dama aki tambe mester a wordo transporta pa hospital.