Parlamentario Shailiny Tromp-Lee (MEP): Codigo di Proteccion den pleno desaroyo+-

Recientemente durante un actividad di entregamento di certificado na Supervisor di Codigo, sra. Sue Ann Ras,  mi a ricibi for di e coordinador nacional di Codigo di Proteccion diferente documento entre otro: Notitie Supervisor di Codigo, Rapport Codigo di Proteccion in volle gang y Jaarverslag 2021. Repasando e documentonan bo ta ripara cu e Codigo di Proteccion ta den pleno desaroyo y ehecucion. 

E Codigo di Proteccion (Meldcode art. 243 den buki 1), conoci den nos Ordenansa Nacional como e “Advies- en Meldpunt Kindermishandeling (AMK)”, a drenta na vigor dia 1 di april  2021. E Codigo di Proteccion ta cay bou di auspicio di e Sociaal Crisisplan (SCP), cu tin como obhetivo pa reenforsa e sistema nacional di proteccion di mucha. E vision di SCP cu e implementacion di e Codigo di Proteccion y e metodo di “Signs of Safety” ta pa yega na un sistema uniforme y adecuado den e sectornan: Social, Hudicial, di Enseñansa y Salubridad, y cu lo yuda na reduci e cantidad di caso di abuso di mucha en general y atende e sospecho di abuso di mucha mas lihe y brinda ayudo mas trempan.

Kico e Ley di Codigo di Proteccion ta encera?

Ta un sistema di proteccion di mucha na Aruba, unda ta salvaguardia e siguridad fisico, emocional y mental di nos muchanan di 0 te 18 aña. Den e sistema aki ta haci uzo di un cuadro di evaluacion. E cuadro di evaluacion ta describi exactamente ki ora un melding ta necesario y con e ayudo mester ta.

Kico tur ya a tuma lugar

Den 2021 a traha riba entre otro riba e siguiente puntonan:

1. un website cu ta den servicio y cu lo ta mas uza p’e profesionalnan;
2. a publica den 2021 un total di 5 boletin informativo p’e instancianan concerni den e 4 sectornan;
3. a cuminsa traha na e sistema pa apunta e Supervisornan di Codigo;
4. a traha un concepto/modelo di Codigo di Proteccion cu e organisacionnan por uza;
5. a traha un concepto/modelo di plan di implementacion cu ta accesibel pa un y tur;
6. a percura pa un nucleo di 12 Train the Trainers pa por duna e training na e futuro Supervisornan di Codigo;
7. ta traha na e materialnan necesario pa por duna les na Papiamento y contextualisa, teniendo cuenta cu e situacion di Aruba;
8. a sera un acuerdo di trabou cu Bureau Sostenemi;
9. a pone hopi atencion na e parti di registracion;
10. a cuminsa traha hunto cu Respeta Mi, Bureau Sostenemi y e trainersnan di Supervisor di Codigo na un training tocante ‘signalering’ pa tur e profesionalnan cu ta traha cu/pa e muchanan aki na Aruba;
11. a inicia cu un investigacion tocante e participacion bou di e hobennan (cu ainda ta andando);
12. a traha riba diferente aspecto y pa cu e proceso den su totalidad cu Augeo Foundation, Vereniging Landelijke Vakgroep Aandachtsfunctioanrissen Huiselijk geweld en Kindermishandeling (LVAK) y Unicef Nederland;
13. A trata Codigo di Proteccion cu tur directiva di scol aki na Aruba;
14. A organisa diferente workshops y training.

Mester bisa cu e desaroyonan ta amplio y cu e pasonan concreto y duradero y poco poco, pero sigur, ta duna contenido real na un punto esencial y necesario den nos proceso di combati abuso di mucha door di señala concretamente, preveni abuso di mucha y na mes momento ta dunando atencion na e parti curativo y hudicial. Ta formando e supervisornan di Codigo di Proteccion necesario den diferente sector y organisacion. Na mes momento mi ta termina subrayando cu abuso di mucha ta un problema di nos tur. Ta keda na cada un di nos pa asumi nos responsabilidad propio na bienestar general y proteccion di nos muchanan.