Dia 13 di april 2022 Gobernador di Aruba, su Excelencia Alfonso Boekhoudt, a huramenta dos miembro nobo di College pa Algemene Rekenkamer. Na Cas Ceremonial a huramenta Sra. drs. Frances X.A. (Xiomara) Croes-Williams y Sr. Christopher F. A. Lake. Pa e ocasion aki tabata presente Sr. R. Croes, casa di Sra. Croes-Williams, Secretaris hunto cu e presidente-interino di Algemene Rekenkamer y Minister-president.
Sra. Croes-Williams, tin su titulo di Master den Bedrijfseconomie di Erasmus Universiteit na Rotterdam. E ta director/partner na e oficina di consultancy WG Plus/Williams & Rasmijn Consultants. Anteriormente Sra. Croes-Williams a traha na Dr. Horacio E Oduber Hospital, Free Zone Aruba N.V. y na Dienst Posterijen Aruba.
Sr. Lake a obtene su specializacion den Controlling na Nyenrode Business University y Universidad di Aruba. E ta e director-general na Aruba Stevedoring Company (ASTEC N.V.).
Aña 2022 ta un aña hopi special pa Algemene Rekenkamer pa motibo di 35 aña di hubileo. Ademas, ta pa prome biaha cu Algemene Rekenkamer Aruba lo asumi e presidencia di CAROSAI. Ta digno pa menciona e hecho cu dia 13 di april 2022 ta exactamente 35 aña pasa, cu e prome miembronan di College di Algemene Rekenkamer Aruba a wordo nombra. Pa por conmemora e hecho aki Algemene Rekenkamer a organisa un encuentro di reflexion.
Algemene Rekenkamer tin e tarea constitucional pa investiga e legalidad, eficiencia y efectividad financiero di Pais Aruba. E posicion di Algemene Rekenkamer ta ancra den e Constitucion di Aruba y stipula den e ley di Algemene Rekenkamer Aruba (LARA). Articulo 1 di LARA ta regla e control ariba e maneho di e placa y material den e sentido mas amplio posibel. Articulo 2 ta bisa cu Algemene Rekenkamer ta situa na Oranjestad.
Algemene Rekenkamer Aruba, como e organo halto di control di Pais Aruba, ta aspira cu su investigacionnan por contribui na mehora e maneho y calidad di administracion publico.
XII Congres CAROSAI
Durante 15 pa 19 di mei 2022 lo tuma luga e di XII Congreso di CAROSAI na Aruba. CAROSAI ta e organisacion di tur Supreme Audit Institutions den region Caribe. Tin un total di 23 pais cu nan rekenkamers ta afilia na e organisacion. E meta principal di CAROSAI ta pa promove mas cooperacion entre e Supreme Audit Institutions (Rekenkamers) den region di Caribe. Ta pa prome biaha cu Aruba lo asumi e funcion di presidencia di CAROSAI. E tema di e congreso ta Targeting Superior Audit Impact.
Mas informacion tocante e congreso lo sigui.