Durante di e tratamento di e ley di presupuesto 2022 mocion number 9 a wordo introduci pa colega sr. Raymond Kamperveen. E mocion aki a wordo traha pa empodera e centro di barionan na Aruba. Hopi ta den un estado critico pa locual ta mantencion, recursonan, activiteitenbegeleiders, beheerders y tambe otro aspectonan. E centro di barionan ta posiciona strategicamente tur rond di nos isla, y ta centronan recreativo, di deporte y otro actividadnan sano cu pueblo por disfruta di nan gratuitamente.
Tin hopi torneonan, practica y competencianan cu ta wordo teni na e centro di barionan aki. Tambe centro di barionan ta wordo usa pa gruponan di baile, teatro, educativo, musico, arte y mucho mas.
Por bisa cu e centro di barionan aki ta multi-funcional y cu nan presencia y bon funcionamento ta ekivalente na un bario sano y sin delicuencia. Un bario den cual tin hopi programa y actividadnan deportivo, educacional y recreativo tin poco problema di criminalidad. Estadisticanan ta demostra cu e actividadnan aki ta incluca disciplina y etica den esnan cu ta ocupanan mes cu frecuencia den esakinan. Mentornan y coachnan den e programanan aki tambe ta conscientisa esnan cu ta participa masha hopi mes tocante uso di droga, arma, sex, violencia, abuso y mucho mas.
Ta pa es motibo aki colega sr.Kamperveen a trece e mocion aki den Parlamento di Aruba. Y no ta pornada, tin un gran necesidad pa Centro di Barionan wordo hiba na un nivel mas halto. Pesey e ta casi increibel cu fraccion di AVP y sr.Mike Eman a vota un biaha mas CONTRA di un tremendo mocion asina aki. Pafor dilanti camera, rueda di prensa y den corant nan ta grita constantemente cu tur cos ta malo y cu mester bin cambio, sinembargo ora nan mester vota pa e cambio, nan ta vota contra! Pakico? Pasobra nan no kier pa Aruba progresa, nos muchanan progresa, pa Aruba ta liber di criminalidad, pa Aruba tin pas, pa pueblo por disfruta di nan centro di barionan.
Pueblo habri bo wowo y exigi respuesta! Aki mi tin documentonan cu ta mustra cu cada letter cu mi ta bisa ta berdad y cu ta demanda un respuesta inmediato! Kico nan ta bay gaña atrobe? E postura anti-Arubiano aki ta constante y hopi demotivador. Ta pesey como parlamentario nobo cu mester wak e tipo di politica desastroso aki ta publica y expone e Mike Eman berdadero cu hopi no kier acepta. Wak e evidencia di documentonan y cana bay na cas di partido of manda un mensahe pakico AVP kier wak nos centro di barionan den ruina!
Si pueblo desea mas informacion di e articulo aki, contact mi na tel: 528-4639 of email mi na: [email protected] / Bo parlamentario y sirbidor di pueblo na bo ordo semper, sin nada di sconde!
