Home International Belgica: Mucha homber (5) a tira su ruman muhe chikito (2) den...

Belgica: Mucha homber (5) a tira su ruman muhe chikito (2) den cabes cu un pistool

SHARE

Seraing, Belgica

Na Belgica un mucha homber chikito di 5 aña accidentalmente a tira su ruman muhe di dos aña cu un arma di candela 9mm.

E incidente a tuma lugar diabierna mainta algo prome cu 12’or di merdia, den centro di e cuidad Seraing na Belgica. Segun medianan na Belgica e mucha ainda ta den hospital y su situacion ta hopi critico. Diferente miembro di famia despues di e incidente aki a wordo interoga y a sali na cla cu e tiro aki no tabata intencional.

Segun investigacionnan haci, e arma di candela a wordo cumpra legalmente. Tata di e muchanan ta pratica e deporte di tiramento. No ta conoci con e mucha aki a yega na e pistool, pasobra e pistool tabata cera den un caha special. E mayornan di e muchanan na momento di e incidente no tabata den e camber unda esaki a tuma lugar.

Despues cu nan a scucha un tiro, e mayornan a core bay den e camber y a topa cu nan yiu muhe cu un tiro den cabes, benta riba vloer. E mucha homber ainda tabata tin e arma di candela den su man. For di investgacionnan haci lo mester sali na cla con e mucha por a yega na e arma di candela aki.

E arma di candela ta un pistool militar 9mm CZ38 fabrica na Tsjechië.