ORANJESTAD – Corte di Husticia a trata e caso penal cu Ministerio Publico a cuminsa contra e homber S.S.(21). E acusacion cu Fiscal a presenta den Corte contra S.S. ta cu riba 2 November 2021, el a purba mata un persona y tabata den posecion di un arma di candela Baretta.
ARUBA NATIVE por a compronde cu Fiscal a bisa cu S.S. a tira riba dos persona, e dama M. y e homber K. E homber K. a sufri un tiro na su man. Fiscal a exigi 3 aña di prison pa S.S.
Durante tratamento di e caso, a sali na cla den den Ranchostraat tabatin un discusion cu a sali for di man y a caba den tiramento. E homber K. y e muher M. aparentemente a bay cumpra droga na un cas, caminda e wela di S.S. lo a reclama K. di a horta su coneu. E homber K., kende a baha for di auto a bisa cu e no sa nada di coneu. E dama M. sinta den auto, a cuminsa insulta e wela y e yiu muher, e dama N., cu ta mama di S.S. a sali y reclama cu si no tin respet. Tur e momento aki, S.S. tabata para den e cas
Net e momento ey e ruman grandi di S.S. a yega den un auto. El a baha y bay na e auto y dal e dama M. un wanta. K. a bay bek na e auto, coy un machete patras den e auto y bay ataca e dama N. El a zwaai e machete riba N. y N. a sconde tras di un borchi di trafico. E machete a dal contra e borchi di trafico. E ora ey S.S. a sali pafor cu un pistool Baretta den man y a tira K. den su man y dispues riba e auto. Esey a pone cu e homber K. y e dama M. a bay.
S.S. a bay paden, laga e arma riba mesa y a bay for di e cas. Hues a bisa cu Polis a bin haya e arma hinca den un paña riba dak di e cas. S.S. a bisa Hues cu e no sa ken a sconde e arma riba dak. S.S. despues a bay Polis entrega su mes.
Fiscal a bisa Hues cu a keda proba cu S.S. a tira. E no ta haya cu aki por papia di defensa propio. El a mustra cu S.S. a saca arma y los tiro. Un bala a herida K. na su man y un otro bala a dal contra e auto den cual M. tabata sinta. Fiscal ta considera esaki intento di maltrato severo. El a pidi Hues pa declara S.S. liber di intento mata.
Na opinion di Fiscal, ora tira di serca riba un hende, e chens ta grandi cu por herida e persona severo. E ta mira cu K. a coy machete pero no ta mira cu tabata ataca e mama N. Fiscal ta haya cu S.S. por a tira den halto of cana bay pero no bay tira riba e homber K. Fiscal a exigi 3 aña di prison pa S.S. Tambe el a exigi pa destrui e arma y balanan. E auto confisca lo mester bay pa e doño.