Cu asistencia di cuater (4) dentista, un total di 52 mucha a wordo invita pa bin drecha nan djente, pa asina por ricibi nan “saneringsbrief”. Cu esaki, e muchanan lo ricibi nan prome limpieza general dentro di seis (6) luna y cobertura di nan cuido dental durante e siguiente añanan.
E expectativa tawata cu algun mucha lo a yora, of lo tawata tin miedo, sin embargo nan a sorprende tur e adultonan cu nan balentia. Tur mucha a sali cu un sonrisa y cla pa cuida nan djentenan tur dia.
Nos kier a gradici Hernandez Dental Care enormemente pa kere den e proyecto aki y habri e porta di nan praktijk pa e muchanan, como tambe Dr. Marvin v/d Linde & Dr. Michella Rasmijn. En particular, nos kier a gradici Dr. Johnny Hernandez pa su iniciativa, esfuerzo, entusiasmo y sosten pa cu e proyecto aki.
Ademas kier a gradici cada un persona den comunidad cu a cumpra un Smile Drive Tumbler pa colabora cu e gastonan envolvi. Tur mucha tambe a ricibi un regaldo di Colgate pa asina nan sigui mantene nan djente bon cuida, cortesia di Martijn Trading y Colgate.
Kiwanis Club of San Nicolas ta spera di por sigui hasi e bunita proyecto aki den futuro cu colaboracion di mas dentista riba nos isla. Di e forma aki nos por sigui pone un bunita sonrisa riba cara di nos muchanan, cual tur mucha na Aruba merece.
Si bo persona ta desea di contribui cu e proyecto aki, pa medio di compra di bo Smile Drive tumbler, esaki por ainda (cantidad ta limita) por medio di nos Facebook page of un di nos miembro nan.
