Accidente serio na Savaneta diasabra atardi a laga dos chauffeur herida atras y hopi daño material
Savaneta – Diasabra atardi pa mas o menos 5:30 p.m unidadnan polis, ambulance y brandweer a sali direccion Savaneta, pa ta exacto altura di unda e gym tawata antes.
Eynan, mesora polis a pidi pa Materiaalwagen debi cu un di e chauffernan envolvi a keda pega den e auto.
Tres auto envolvi
Den e accidente tawata tin dos pick up y un truck grandi cargando santo, e truck di santo a bay para basta meter mas pariba y tambe a sufri daño considerabel parti dilanti.
Pick up berde lo a sali dilanti e truck di santo
Na e sitio chauffeur di e truck di santo a bisa Arubanative.com cu e pick up color berde a sali/subi su dilanti causando e accidente unda e pick up color blanco tambe a haye envolvi.
Varios ambulance na e sitio
Tres ambulance a presenta na e sitio. Bomberonan a logra saca chauffeur di e pick up color berde y pasa over pa Paramediconan, algun minuut despues chauffeur di e pick up color blanco tambe a wordo saca di e auto.
Ambos chauffeur tawata na tino y apesar di e impacto fuerte nan tawata comunica cu e Paramediconan.
Caminda cera
Trafico mester a wordo desvia debi na e restonan y tambe tera cu basha ariba caminda, takelwagen mester a lanta e pick up nan pa asina trafico por circula bek.
Departamento di trafico tawata tin e tarea pa haci investigacion di e susedido.
