ORANJESTAD – Awe merdia un biaha mas tabatin pro forma di e caso asesinato John Anthony (Poentje) Castro. Via video conference a haci esaki, caminda e sospechoso Anderson Rasmijn tabata den un oficina na KIA mientras cu den sala di Corte tabata Hues, Fiscal y abogado mr. Carlo hunto cu mr. Arendsz Marchena. Ta asina cu mr. Arendsz Marchena lo defende Rasmijn pa e caso pa cual e ta sera den KIA promer cu el a wordo deteni pa e caso di asesinato di Poentje Castro.
ARUBA NATIVE por a compronde cu awor a apunta un psychiater sigur pa evalua Rasmijn. E director di Respaldo, señor van Galen, a informa Hues pa medio di un carta cu e mes lo bay evalua Rasmijn ya cu e otro psychiaternan a yega di atende Rasmijn den pasado. Cu esaki ta cumpli cu e peticion di abogado mr. Carlo, kende a pidi pa haci un evaluacion di e estado mental di Rasmijn.
Tambe a keda palabra cu mr. Carlo cu su cliente lo por bay scucha audio cu Recherche ta dispone di dje. Esaki lo mester sosode sin cu miembronan di Recherche lo ta presente.
Tambe a keda palabra cu mr. Carlo y Corte di Husticia lo haya potret di zapato cu lo ta wordo menciona den e documentonan di investigacion.
Na final, Hues a bisa cu e ta pospone e caso pa dia 6 di Mei 2022 caminda lo bay dedica henter e mainta pa tratamento di e caso. Manera ta conoci, Anderson Rasmijn ta wordo acusa di a tira mata John Anthony Castro riba 22 December 2010.