Home » Cuanto proteina ta necesario pa mantene nos musculo nan?

Cuanto proteina ta necesario pa mantene nos musculo nan?

by Admin
0 comment 157 views

Skirbi pa: Anton Marchena

E chens ta grandi cu pa e edad di 80 aña, nos lo a perde casi mitar di e musculo cu nos tabata tin na 20 aña di edad. Mirando cu proteina ta un di e factor nan cu lo por evita esaki, ta un di e motibo nan importante pakiko e lo ta e topico di e articulo aki. Kiko eigenlijk ta proteina? Sigi lesa pa e contesta.

Proteina
Manera mi a splica den e articulo anterior, proteina ta un di e 3 macronutriente nan cu nos ta consumi den gran cantidad den nos dieta huntu cu carbohidrato y vet. Proteina tin hopi funcion den nos curpa, algun di nan ta lo siguiente.

Structura
Nos cuero, cabey, huña, weso y musculo pa menciona algun, tin su structura danki na proteina. Nos musculo nan ta traha pa gran parti di proteina. Proteina ta fungi como e fundeshi di cada celula den nos curpa. Ora bo bai arma un tent pa bo campa bo tin e lona pero tambe e palo nan cu bo ta uza pa duna e tent su forma y
pa mantene e tent para. Proteina tin e mes un funcion den nos curpa.

Energia
Nos curpa por uza proteina pa crea e energia cu ta necesario pa nos por move. Esaki no ta ideal mirando nos por crea energia for di vet of sucu y asina laga proteina hasi otro funcion nan mas importante manera algun cu mi a caba di menciona. Nos curpa por uza proteina como energia ora nos come mas proteina cu
ta necesario, ora nos no come suficiente carobohidrato of ora nos keda largo sin come.

Immuunsysteem
Ora un virus drenta den nos sistema, nos curpa ta traha anticurpa pa combati e virus aki. E anticurpa nan aki ta consisti pa gran parti di proteina. Persona nan cu no ta consumi suficiente proteina for di nan dieta, ta core riesgo di tin un immuunsysteem menos fuerte.

Hormoon
Pa nos curpa por uza e energia di e cuminda cu nos a caba di come, nos curpa mester di insulina. Insulina ta un hormoon cu ta wordo traha door di nos pancreas cu ta duna nos curpa e señal pa absorbe e sucu for di nos systema vascular y pa asina uza esaki como energia. Insulina y manera hopi otro hormoon den nos curpa ta traha di proteina.

Al final, cuanto proteina ta necesario?
E mes un proteina cu bo curpa ta uzando por ehempel pa duna bo musculo su structura awo, no lo tey mas aki 3 luna. E motibo pa esaki ta cu nos curpa ta constantemente reemplaza e proteina nan cu e ta uza. Pa ta mas specifiek, 1 pa 2 porciento di bo musculo ta wordo reemplaza diariamente pa otro set di proteina.
Manera un taira di auto mester wordo cambia despues di tempo, bo curpa tambe ta hasi esaki cu e proteina nan. Pa e motibo aki nos mester consumi suficiente proteina for di nos dieta.
Cuanto proteina ta necesario ta depende cuento bo ta pisa, bo edad y e tipo di actividad fisico cu bo ta hasi.
Pa un adulto saludabel cu no ta hasi ehercicio, 0.8 g di proteina pa cada kilogram(kg) di peso ta suficiente. Bo por mira esaki asina ki: (bo peso actual na kg) x 0.8 = ta e total proteina cu bo mester pa dia den gram.
Den otro palabra un persona cu ta pisa 75 kilo, mester 60 gram di proteina pa dia (75 x 0.8 = 60 gram).
Pa un adulto saludabel cu ta hasi ehercicio , sea ta weight training of simplemente core, entre 1.2 gram te cu 2.0 gram di proteina pa cada kg di peso ta suficiente pa mantene of crea mas musculo. Mas fuerte bo ehercisio ta, mas halto den e rango bo persona su necesidad ta.

Persona nan di edad
Mas nos edad subi, mas importante e ta bira pa nos mentene nos musculo. Mirando cu na edad grandi, mas musculo ta corala cu un miho capacidad pa ta independiente. Den otro palabra, mas largo bo lo por move sin asistencia.
Lastimamente loke ta normal di mira ta cu pa e edad di 80 aña, nos lo a perde casi mitar di e musculo cu nos tabata tin na e edad di 20 aña. Un di e factor nan cu ta hunga un rol ta cu na un edad halto, nos no ta absorbe proteina mes un eficiente manera na jong. Cual ta significa cu e 80 gram cu nos lo consumi normal
completamente na jong, nos no ta consumi completamente na bieu. Pa e motibo aki mas grandi nos bira, mas proteina nos ta rekeri. Persona nan di edad mester consumi entre 1.0 te cu 1.2 gram di proteina pa cada kilogram di peso.

Vegan of vegetariano
Na un persona cu ta sigui un dieta vegetariano of vegan, ta wordo recomenda pa consumi mas cu loke mi a caba di menciona. E motibo ta cu den un dieta vegan of vegetariano ta mas dificil pa absorbe e proteina cu nos ta consumi. Den un dieta vegetariano ta wordo recomenda pa come 20% mas proteina di loke ta wordo
recomenda normal y vegan 30% mas. Dus si normal bo ta rekeri 70 gram di proteina, den un dieta vegan esaki lo ta 91 gram y vegetariano 84.

Den ki producto bo por haña proteina

 

E beneficio di proteina ora bo ta bahando peso
Y por ultimo mi kier sera e articulo cu e importancia di proteina ora di baha peso. Lastimamente ora bo baha peso, no ta solamente vet ta loke ta wordo perdi pero tambe musculo. Estudio nan ta demostra cu pa mantene lo mas hopi musculo
possible durante cu bo ta baha peso, un dieta cu suficiente proteina adhuntu cu cualkier tipo di ehercisio di peso ta lo ideal.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio