ORANJESTAD- Riba dia di Himno y Bandera, Minister di Cultura a bishita e exposicion di Archivo Nacional Aruba, “Aruba, den mashin di tempo”, caminda por a aprecia potretnan di Aruba di antes y awo.
Ta trata aki di un exposicion cu Archivo Nacional Aruba conhuntamente cu Fundacion Amigonan di Archivo a prepara en conexion cu Dia di Himno y Bandera. Cu e exposicion aki ta mustra pa medio di potretnan e Aruba di antes y e Aruba di awor, por mira e sitio of edificio su ubicacion den pasado y actual, asina por tuma nota di e desaroyo durante añanan cu a pasa. E potretnan ta saca pa diferente fotografo, local y di exterior manera e.o. Jan Geurts, dhr. Hochstul, de Graaff y Clyde Harms.
E exposicion lo keda habri pa e proximo lunanan y por wordo bishita durante oranan di trabao. Minister Xiomara Maduro ta gradici Archivo Nacional Aruba y voluntarionan pa e exposicion, masha danki pa conserva y expone e potretnan historico nan aki.
