ORANJESTAD: Siman pasa Minister Endy Croes a ricibi bishita di cortesia pa cera conoci cu Sabelle ‘Sabi’ Saragoza miho conoci como e ‘Bonaire Drift Princess. Sabi tabata na Aruba en conexion cu nos dia nacional unda cu a participa ne evento ‘King of the Ring 2022’ cu a tuma luga fin di siman pasa na International Raceway Park Palo Marga. Presente na e encuentro ameno aki tabata sra. Ilse Felida y sr. Wimpy Saragoza kende nan ta mama y tata di Sabi. Como embahadora di Boneiro, Sabi a regala Minister Endy Croes un detaye di TCB ku articulonan di Boneiro y e Mandatario a obsekia un detaye como mustra di aprecio y gratitud.
Minister Endy Croes ta felicita Sabi pa su curashi y determinacion como hoben alabes mucha muhe cu ta practica e deporte di ‘drifting’. Alabes ta gradici e mayornan cu ta duna nan yiu e sosten pa nan por eherece cu amor y pasion e deporte di ‘drifting’.
