ORANJESTAD – E caso di e homber P. (35) cu a abusa di un mucha homber di 15 aña awor lo wordo trata pa Corte Superior.
ARUBA NATIVE por a compronde cu e acusado P., un “leerplicht ambtenaar”, a apela su castigo di 4 aña di prison di cual 6 luna ta condicional.
Tratamento di e caso aki a sosode na Januari 2022 caminda Fiscal a bisa Hues cu tin suficiente prueba di sosten.
Fiscal a mustra cu tin video di seguridad na e cas cu ta mustra cu P. tabata 4 minuut den e cas y mas o menos 6 minuut su so cu e mucha den auto. Por mira cu ora P. a sali for di e cas, e tabata subiendo su carson. Na opinion di Fiscal, tur esakinan ta mustra loke e mucha ta bisa esta cu P. a haci actonan inmoral cun’e y a purba penetr’e.
Fiscal a bisa cu P. ta conoci como coach di futbol cu ta traha cu muchanan. Su trabao ta pa yuda y salba guardia muchanan pa sigui studia. Fiscal ta haya cu P. no a haci su trabao sino a sigui su gana.
Fiscal no ta haya cu P. por sigui haci e trabou aki mas. El a exigi 4 aña di prison di cual 6 luna ta condicional cu un tempo di prueba di 3 aña. Esaki cu e condicion cu P. ta cay bou guia di Reclasering. Tambe Fiscal a exigi pa prohibi P. pa haci su trabao te caminda ley ta permiti.
Dia 4 Februari 2022 Hues a bisa cu ta un hecho cu e mucha homber di 15 aña y P.(35) tabata hunto. P. tabata den cas serca e mucha.
Hues a bisa cu tin indicacion cu P. via social media ta persigui muchanan pa abusa di nan. A haya den cellular di P. potret di mucha menor di edad y e mucha a bisa Polis cu P. ta un maniac. Tin un otro mucha cu a bisa cu P. a ofrece placa pa abusa di dje.
Na opinion di Hues, mirando cu esakinan ta cuadra cu loke e victima a pasa aden, e ta haya cu tin suficiente prueba di sosten.
Hues a confirma e exigencia di Fiscal. El a condena P. na 4 aña di prison di cual 6 luna ta condicional cu un tempo di prueba di 2 aña. Esaki bou guia di Reclasering. Hues no a menciona nada cu ta prohibi P. di sigui haci su trabou.
Ta asina cu despues di e sentencia, e acusado y Fiscal tin un periodo di 2 siman pa evalua si ta apela e sentencia. Ta asina cu P. a apela e sentencia. Esey ta nifica cu awor Hof di Corte Superior lo bay trata e caso y mester dicidi si P. ta culpable of no.