ORANJESTAD – Corte Superior awor lo bay trata e apelacion di Weert contra su castigo pa a abusa di un mucha.
ARUBA NATIVE por a compronde cu despues di a scucha su sentencia dia 18 Februari 2022, Rudy “Elvis” Weert a apela contra su castigo di 9 aña di prison.
Na Januari 2022 tratamento di e caso a tuma lugar caminda Fiscal a exigi 12 aña di prison pa Weert. Fiscal ta haya Weert culpable di a abusa di e dama G. (27), tempo cu G. tabata menor di edad. G. ta yiu di e partner cu Weert tabata cun’e e tempo ey. Fiscal ta haya legalmente proba cu Weert a laga haci dos vez abortus riba G. Ademas Fiscal ta haya proba cu Weert a abusa di dos mucha B., kendenan ta yiunan di Weert su partner actual.
Dia 18 Februari 2022, Hues den su sentencia a bisa cu e ta haya legalmente proba cu diferente biaha Weert a tene relacion sexual cu e dama G. tempo e tabatin entre 14 y 17 aña. Hues ta haya Weert a admiti di a haci abortus.
Hues a bisa cu e no ta haya proba cu Weert a abusa di e muchanan B. Hues a bisa cu no tin prueba di sosten. Hues ta haya cu KZP no a haci mas investigacion pa determina si loke e muchanan a declara ta asina.
Hues a bisa cu e ta tene cuenta cu a subi e castigo pa abuso di mucha. El bisa cu G. na edad di 27 aña tin trauma pa loke Weert a haci cun’e. Hues a condena Weert na 9 aña di prison.
Awor cu Weert a apela e castigo di 9 aña, Corte Superior lo bay trata e caso aki. Tres Hues lo bay evalua e caso y dicidi si e castigo ta husto of no. Si Hof haya cu Weert ta culpable pa tur dos e acusacionnan, e chens tey cu e castigo lo subi. Si Hof haya cu Weert ta culpable pa a abusa y haci abortus cu e dama G., e chens tey aki tambe cu e castigo por keda mesun cos of e por subi. Tur cos ta awor den man di e tres Huesnan cu lo bay trata e caso y e defensa cu e abogado di Weert lo bin cun’e.