Nos atleta di Para Taekwondo Masculino K 44 -80kg y atleta Paralimpico Elliott Loonstra ta poniendo Aruba un bes mas hopi halto. E ranking mundial di Para Taekwondo cu a wordo publica recientemente na maart 2022 ta mustra cu Aruba ta posiciona den e septimo lugar den ranking mundial y na prome lugar den e region Pan Americano (Continente Americano Norte, Central, Sur y Caribe).
Elliott Loonstra PLY
E Comite Paralimpico Internacional (IPC) a otorga reconocimiento na Elliott Loonstra pa su contribucion na e Movimiento Paralimpico y lambe pa su trabou duro, compromiso y promocion di e balornan Paralimpico.
E letternan postnominal manera Phd. of Md. ta wordo coloca tras di e nomber di un persona pa asina indica e cargo cu e ta ocupa, un honor cu a wordo otorga of si e ta miembro di un fraternidad. Asina pues PLY ta wordo añadi hunto cu e nomber di e atleta Paralimpico riba documentonan oficial, rednan social, curriculum vitae, tarheta profesional, na presentacionnan, na e firma di un email y cualkier otro lugar cu su nomber wordo utilisa.
Proximamente
Bo por sera conoci cu Elliott y participa na un les gratis di arte marcial pa defensa personal na onehealthydayaruba.com riba diadomingo 20 di maart 2022 di 3:00 – 5:00 pm na BodyZone Aruba y di 6:00 – 6:30 pm na Paseo Herencia. Pa mas informacion tuma contacto libremente na +297-630-4743 of [email protected] .
Desafio
Elliott Loonstra PLY y su coach Luciano Mazzeo ya caba ta preparando pa e proximo desafio, esta e 2022 Pan American Para Taekwondo Open cu lo tuma lugar dia 15 di april 2022 na Rio de Janeiro, Brazil. Aki nan lo busca pa ripiti e hazaña na 2019 caminda cu Elliott a logra llega na e podium door di a gana e medaya di brons, e promo medaya internacional pa Aruba den Para Taekwondo.
Un mencion y agradecimiento especial ta pa e pueblo di Aruba pa su apoyo na e movimiento Paralimpico di Aruba. Nos ta spera di por representa Aruba na e weganan 2023 Para PanAmericano na Santiago de Chile y tambe na e weganan Paralimpico 2024 na Paris, Francia.
