ORANJESTAD – Otro scol cu nos mandatario encarga cu cultura a bishita diamars mainta tabata Scol Preparatorio Santa Jacinta. Un grupo di recepcion forma pa muchanan di e scol bisti na indjan a ricibi Minister Xiomara Maduro. Klasnan a presenta poesianan, canto y baile, demostrando nan amor pa nos pais Aruba. A presenta na e mandatario e bunita obranan di man cu a muchanan a traha usando e.o. boonchi di difernte color pa nan decora nan obranan di bandera di Aruba. Minister Xiomara Maduro tabata hopi contento di por a bishita e scol y a gradici tur e jufrouwnan di e scol y tambe e muchanan di scol. Alabes a invita tur mucha y docente di Scol Preparatorio Santa Jacinta pa celebra Dia di Himno y Bandera hunto cu famia, bishitando e diferente actividadnan cu tin den barionan. Di nan banda e scol a keda masha encanta cu e bishita di minister di Cultura Xiomara Maduro y a regala e mandatario un bunita areglo di flor. Na final minister a desea tur muchanan y jufrouwnan un Feliz Dia di Himno y Bandera y e muchanan hunto den coro a expresa Pabien Aruba cu nos celebracion.
