Aruba durante añanan a bin ta copia y/of ta traha conhunto cu teamnan Hulandes di husticia. Na Aruba actualmente nos tin un ‘afpakteam’ y nos tin RST (Recherche Samenwerkingsteam).
Locual a yama nos atencion ta dicon Aruba hunto cu Hulanda ainda no a cuminsa cu e HARC-team?
Esaki ta referi na un conhunto yama ‘Het Hit And Run Cargo’. Esaki ta un cooperacion organisa y regula cu ta consisti di agentenan di Douane, FIOD (Fiscale Inlichtingen – en Opsporingsdienst), Marietiem Politie y OM (Openbaar Ministerie Rotterdam). E HARC-team aki tin casi 25 aña di existencia y ta encarga cu investigacionan profundo den e area di waf Rotterdam. E meta cardinal ta pa combati traficacion di droga.
Diahuebs ultimo den waf di Rotterdam e team aki a logra confisca 1100 kg di cocaina, tur tawata scondi den tasnan diseña pa bay gym.
Tawata trata di un container cu a haci un viahe bastante largo, saliendo for di Nicaragua direccion Panama y despues pa Colombia. Di Colombia esaki a sali direccion pa Rotterdam.
Ora esaki a yega waf di Rotterdam e la wordo controla door di HARC-team. Aki a bin encontra e container cu tawata contene pinda procedente di Nicaragua.
Den e container a haya 30 tas di gym carga cu blokinan di cocaina, cu a suma na 1100 kg. E cantidad di cocaina aki a ser balora na un total di 81 miyon Euro. E pindanan mes lo mester a continua transportacion pa su destinacion, Poland. Segun informacion e compania na Poland lo no tin nada di haber cu e droga encontra.
Aki na Aruba nos tin e proyecto yama ‘Project Team Drugspanden’, cu a wordo lanta pa combati benta di droga. Pero e raiz di e problema no ta ricibi suficiente atencion, cu esaki ta referi na e entrada continuo di droga na Aruba.
Cu mas team dedica na combati y persigi e asunto aki, Aruba lo tin mas forsa den e lucha pa combati di no solamente droga pero tambe e traficacion di arma y placa.
Aki ta unda e ora a yega pa activa un HARC-team na Aruba. Nos tin e personalnan y sigur cu ayudo di Hulanda e combatimento di droga y mas lo mester por bira un realidad a corto plazo. Mustrando Hulanda tambe cu Aruba kier combati tur locual cu ta ilicito, manera droga y armanan di candela.
