ORANJESTAD – Corte di Husticia a trata e caso penal cu Ministerio Publico a cuminsa contra e homber C.M.(24) y J.P. (20), kendenan ta wordo acusa di a menaza dos agente di Polis cu morto.
ARUBA NATIVE por a compronde cu apesar cu C.M. y J.P. ta desmenti, Hues ta haya cu nan ta culpable y a condena nan na castigo combina esta trabao pa comunidad y un parti condicional cu tempo di prueba.
C.M. y J.P. a wordo deteni patras riba tereno di warda di Polis di Shaba, despues cu nan hunto cu un dama a drenta pa papia cu e homber J. cu ta encarcela den un cel. Nan lo a pasa via waya cu tin buraco. Segun C.M. e dama tabata sinti’e malo door cu su amigo J., kende ta amigo di C.M. y J.P., ta sera. E dama tabata kier a papia cu J. y nan a dicidi di bay cun’e.
Ta asina cu tanto C.M. como J.P. tabata burachi y aparentemente bou influencia di droga. Polis a bay check y a haya nan scondi y a detene nan. Durante e proceso di detencion, C.M. y J.P. lo a menaza e agentenan di Polis cu morto.
Den Corte tanto C.M. como J.P. a nenga di a menaza Polis cu morto. Nan a reclama e forma cu nan a wordo maltrata door di Polis. C.M. a bisa Hues cu el a puntra e agentenan si nan kier bringa. Hues a mustra cu segun e relato di Polis, C.M. a bisa cu si nan ta sin uniform y cu nan famia nan lo wak kico lo pasa. C.M. a bisa Hues cu e momento ey nan tabata bati’e. El a bisa nan stop di dal’e y pa un so bin dal’e.
Hues a bisa cu ta logico cu Polis a actua asina ora cu hende ta subi riba tereno di warda di Polis. Segun C.M. e tabata burachi y Polis a boei e y hib’e den auto y despues a dal’e. El a bisa cu ora el a yega warda di Polis, nan gar’e na pia y zwaai e pafor. Hues a puntra C.M. si el a haci denuncia. El a bisa Hues cu si e haci denuncia nan lo no kere.
J.P. a bisa Polis pa stop di dal’e y pa bringa man cu man. Hues a bisa cu segun e relato di Polis, J.P. lo a bisa cu e tin un arma y ora e mira nan riba caya, e lo tira nan. J.P. a desmenti di a bisa esey. Segun J.P., e agentenan ora tabata hib’e cel lo a purba hinca algo den su atras. E ta considera nan pro pedofile. J.P. emociona a bisa Hues cu e lo bay haci denuncia. Hues a bisa cu segun relato di Polis, C.M. y J.P. tabata burachi y tabata haci fastioso. E no ta mira pakico e agentenan di Polis ta bay gaña den e relato.
Hues mustra cu C.M. a yega di wordo condena pa violencia y J.P. pa maltrato.
Fiscal a bisa cu tanto C.M. como J.P. a desmenti di a menaza Polis pero Fiscal no tin motibo pa duda den loke ta para den relato di Polis. Na opinion di Fiscal, C.M. y J.P. nan actitud emociona den Corte ta mustra cu no tin duda cu nan lo a menaza e agentenan di Polis. El a exigi 40 ora di trabao pa comunidad kitando e tempo 3 dia cu nan tabata sera.
Despues di a scucha defensa di abogado, Hues a sera tratamento di e caso y a dicta sentencia di biaha. Hues a bisa cu ambos ta desmenti di a menaza y cu nan tabata burachi. Hues ta di opinion cu loke ta para den relato ta di Polis, en principio mester kere. Na opinion di Hues, por bien ta cu Polis a actua cu man duro ora a haya hende riba tereno di warda di Polis. Pero cu Polis lo bay gaña den e relato, no tin suficiente prueba pa esaki. Hues a condena nan na 50 ora di trabao di cual 20 ora ta condicional cu 2 aña di prueba. Di e 50 ora di trabao mester kita 3 dia cu nan tabata sera. En total e ta bira 24 ora di trabao cu C.M. y J.P. mester traha.