Home Lifestyle Pa baha peso, bo tin di baha man na sucu of vet?

Pa baha peso, bo tin di baha man na sucu of vet?

SHARE

Skirbi pa : Anton Marchena

Mayoria aviso con pa baha peso cu ta wordo comparti di boca pa boca ta “baha man na sucu”, “hasi mas ehercisio” of hasta elimina carbohidrato manera aroz of pan completamente for di bo dieta.. Otro ta bisa no come vet paso esey ta loke ta pone bo subi di peso. Awo ken di nan tin razon? Sigi lesa pa e contesta.

Prome nos cuminsa, kiko ta macronutriente?
Nos dieta ta consisti gran parti di e tres macronutriente mihor conoci como proteina, vet y carbohidrato. Cada un tin nan funcion pa cu nos curpa. Di nan tres nos por argumenta
cu proteina ta esun mas importante, vooral ora bo ta desea di baha peso. Pa e mes un motivo aki e tema di proteina lo wordo trata den un otro articulo.

Carbohidrato
Nos ta consumi carbohidrato den dos forma: carbohidrato simple y compleho. E sucu cu bo lo huza pa te of kofi por ehempel, ta un forma di carbohidrato simple. Bo curpa por digesti I absorbe e tipo di carbohidrato aki fasil. Pa e razon aki e ta wordo yama “simple”.
Carbohidrato compleho (ingles: complex) ta bini den forma di aroz, pan of berdura por ehempel. E tipo di carbohidrato aki ta tarda un poco mas pa wordo digesti door di nos curpa. Tin biaha e no ta wordo digesti mes y esaki ta locual ta resulta como excremento. Mayoria fuente nan di carbohidrato ta consisti di un mixto di e dos tipo di carbohidrato nan aki, pan por ehempel ta consisiti pa mayoria parti di e carbohidrato compleho y tiki
carbohydrato simple.

Vet
Nos ta consumi vet for di diferente cuminda manera e azeta pa cushina cune, keshi, webo, pisca, nuez y sin lubida avocado. Vet tambe tin su function pa cu nos curpa, cual un di nan ta por ehempel zorg pa nos curpa absorbe vitamina nan importante cu sin vet nos no lo por consumi. E motibo aki riba su mes ta un dicon vet ta importante den un dieta saludabel. Loke tin di paga tino cune ta e tipo di vet cu nos ta consumi. Pero esaki ta
topico pa un otro biaha.

E pregunta ta awo, cua di nan dos bo tin cu baha man na dje pa baha peso?
E pregunta aki a wordo contesta na 2016. Algun aña prome, 609 persona cu sobrepreso (pero sin diabetes) a bai di acuerdo pa doe mee na un estudio di 1 aña largo. E 609 persona nan a wordo dividi den dos grupo y a wordo instrui door di e investigadornan pa cu un grupo consumi menos carbohidrato pa un aña largo y e otro grupo consumi menos vet pa un aña largo. E grupo totaal tabata consisti di hende homber (43%) y hende muher (57%) cu un average di 40 aña di edad.

E motibo pa e estudio aki tabata pa por mira cua di e dos grupo nan lo a baha mas peso na final di 12 luna. E resultado aki lo por duna bista na si tin mas beneficio na baha bo consumo di vet of carbohidrato ora ta trata pa baha peso.

Loke ta importante pa pone enfasis riba dje ta cu nan a wordo instrui pa come menos carbohidrato of vet, nan no a elimine for di nan dieta.

Resultado
Na final di e 12 luna nan, tur dos grupo a logra baha peso door di sea come menos carbohidrato of vet. E persona nan cu a baha nan consumo di carbohidrato a baha cu un average di 6 kilo, 0.7 kilo mas cu e participante nan cu a baha nan cuminda door di come menos vet, cual a baha 5.3 kilo.

Kiko e resultado aki ta nifica?
Abase di e estudio aki nos por concludi cu un persona sobrepeso (sin diabetes), por baha peso door di reduci e totaal cuminda cu e ta consumi door di come sea menos carbohidrato of menos vet. E 0.7 kg di diferencia no tabata suficiente grandi, segun e investigadornan, pa por conclui cu consumi menos cuminda door di come menos carbohidrato ta resulta na baha mas peso cu come menos vet.

Den otro palabra, sea bo scohe pa come menos vet of carbohydrato, bo por baha peso tanten bo ta consumiendo menos cuminda/caloria cu bo ta kima. E decision ta keda na
bo persona a base di bo preferencia. Bo gusta bo aroz of pan? Bo por baha peso incluiendo esaki den bo dieta.

E resultado aki ta hopi importante mirando cu awendia tin diferente dieta ta wordo propaganda como e “unico y miho” manera pa baha peso, sin tene en cuenta e preferencia di e persona. Esaki no ta caso. Tin diferente cambio cu bo por hasi den bo dieta pa baha peso. Abo por scohe con bo ta desea di hasi esaki.

E estudio:
Gardner, C. D., Trepanowski, J. F., del Gobbo, L. C., Hauser, M. E., Rigdon, J., Ioannidis, J. P. A., Desai, M., & King, A. C. (2018). Effect of Low-Fat vs Low-Carbohydrate Diet on 12- Month Weight Loss in Overweight Adults and the Association With Genotype Pattern or Insulin Secretion. JAMA, 319(7), 667. https://doi.org/10.1001/jama.2018.0245