Home International E prome persona cu a haya e prome transplante di curason geneticamente...

E prome persona cu a haya e prome transplante di curason geneticamente modificia di un porco, a fayece.

SHARE

Dos luna pasa e operacion di e transplante di curason a marca historia. E prome homber cu a haya un curason di porco geneticamente modificia y lamentabelmente e no a sobrevivi y a fayece antayera. Asina Maryland Hospital a informa.

Maryland, Merca:
David Bennet (57) a haya atencion den media mundialmente, despues cu dia 7 di januari ultimo e la haci un transplante di curason, pero cu un curason di porco cu ta geneticamente modifica, despues di dos luna esaki no a duna e resultado.

Segun e hospital su salud den e ultimo dianan a bay hopi atras y antayera e la fayece. E mediconan cu tabata trat’e no no por bisa kiko ta exactamente e causa di su morto. Esaki tabata e prome biaha cu a usa un curason di porco pa haci un transplante di curason.
David Bennet su yiunan a gradici e hospital pa a duna nan tata un chens pa trata na salba su bida por medio di e operacion aki. Nan a bisa cu nan ta spera cu esaki ta e comienso di un speransa nobo y no e final.

E mundo medico tin decadanan ta buscando e posibilidad pa usa organonan di bestia pa haci transplantenan pa asina trata na salba bida di e ser humano. David Bennet no tabata tin niun otro opcion, e transplante aki tabata su unico speransa y pa e motibo aki e tabata un candidato perfecto pa e transplante aki.
For di comienso e la wordo informa cu no tin garantia cu e lo ta exitoso. Despues di e operacion tur cos tabata mustra cu Bennet tabata recuperando. Segun e chirurg cu a trat’e a comenta cu Bennet tabata un pashent balente y a bringa te na final, e chirurg ta tristo cu e perdida aki.

Na Merca actualmente tin un pedido grandi di transplante di organonan. Mas di 100 mil persona ta riba e lista di espera nacional. Miles di persona ta fayeciendo pa motibo cu nan no ta haya un transplante di organo na tempo.