Interogacion nonstop, for di mainta trempan te den careda di 8’or y mey di anochi, recherchenan a keda interoga
Fito Croes, cu excepcion di un lunchbreak cortico merdia. Durante e oranan largo di interogacion e tabata acompania pa su abogado.
ORANJESTAD:
Dialuna den oranan tempran di mainta un team di Ministerio Publico, landsrecherche y Cuerpo Policial Aruba a haci un entrada hudicial na residencia di Sr. Fito Croes, na Kurimiauw
Aki a confisca varios articulo y documento cu lo por ta importante pa e investigacion.
Fito a wordo deteni como sospechoso den e caso Flamingo, e la wordo hiba na oficina di Landsrecherche pa interogacion. Sr. Croes ta wordo sospecha di ta envolvi den iregularidadnan den ortogamento di terenonan comercial di erfpacht den e periodo di 2017 te 2019.
Fito ta actualmento den e mundo di Real Estate, e ta desaroya edificionan y bende condominiun.
Den pasado e la yega di traha durante gobiernonan di AVP, como coordinador di su ruman Tico Croes, cu tabata minister bou Gabinete di Henny Eman.
Caso Flamingo ta canando su caminda y esaki ta e di dos detencion caba. Den e dianan nos dilanti lo por spera mas entradanan hudicial y mas detencion relaciona cu caso Flamingo.
