Prome detencion a cay den Caso Flamingo, ta trata di un dama cu tabata traha den oficina di Ex Minister Otmar Oduber.
Oranjestad:
Diaranson den careda di 2’or di merdia, e transportwagen di C.E.A. a trece e dama E.F. na oficina di Landsrecherche pa interogacion. E.F ta e prome sospechoso den Caso Flamingo cu a wordo deteni. Den careda di 7 or y 45 di anochi, nan a caba cu e interogacion y E.F a wordo hiba warda di San Nicolas.
E.F. den pasado tabata traha hopi cerca di varios ex Minister di Gobiernonan anterior di A.V.P. y tambe den e coalicion anterior, e tabata traha den oficina di Ex Minister Otmar Oduber.
E caso Flamingo tambe tin di haber cu iregularidad di otorgamento di terenonan comercial di erfpacht den e periodo di 2017 te 2019.
E investigacion di caso Flamingo a inicia na september 2019.
Riba diaranson 7 di oktober 2020, Landsrecherche, RST y Cuerpo Policial di Aruba a tene un huiszoeking, bou guia di huez-comisario a ristra den un cas y un oficina.
E team di onderzoek a confisca administracion y cargadornan di informacion digital, tur esaki tabata di importancia pa e investigacion di e caso aki.
Esaki ta e comienso di un investigacion cu lo por bay dura largo, e tin algun similaridad cu e Caso Avestruz di ex minister y actual parlamentario Benny Sevinger di A.V.P., semper autoridad ta cuminsa cu esnan rond y na ultimo ta detene e kopstuk.
Den e siguiente dianan of simannan no lo descarta e posibilidad cu mas sospechoso lo wordo deteni pa interogacion.
