Diamars ultimo a tuma luga e prome reunion den comision fiho di salubridad tocante un posibel samenwerking/fusion entre IMSAN y HOH. E prome reunion tabata destina pa director di IMSAN dr. Joel Raijnherc duna su punto di bista riba e topico aki. Pami a bira mas cla c’un colaboracion entre IMSAN y HOH, no solamente ta inevitabel, pero tambe necesario pa por duna un servicio medico optimal na nos pueblo y bishitantenan. Durante e reunion aki a resalta cu den solamente 2 aña di tempo, IMSAN a logra spaar AZV 20 miyon florin. A logra esaki door cu IMSAN mes por a trata 400 pashent compara cu antes mester a wordo manda Colombia. Riba cada pashent a spaar 50.000 florin.
IMSAN a bira un hospital oficial na october 2021. Riba peticion di mi persona dr Raijnherc a percura pa manda mi un carta cu ta confirma e bunita logro aki.
Diaranson tabata turno pa director di HOH splica su banda di e medaya con Aruba lo beneficia di un fusion entre IMSAN y HOH. Ta di admira con duro y pasiona e profesionalnan y staf di HOH ta traha na bienestar di salud di nos pueblo. Na final di e reunion director di HOH no a logra convence ami cu un fusion cu IMSAN ta algo cu Hulanda ta exigi, tampoco cu e ta necesario pa brinda un miho servicio medico pa Aruba, mucho menos na ki manera e lo kier logra un fusion exitoso.
Den mi opinion IMSAN mester keda e diamante independiente, pero cu lasonan estrecho cu su partnernan na bienestar di nos pueblo. Sirbiendo Aruba, un orguyo pa San Nicolas.
