Rooi Afo:
Diamars den oranan di merdia un polis atento na burger a mira un boksmento sosode riba e caminda di rotonde di Tanki Leendert bay noord na altura di Eumar Lock and Key Services na Catiri, e la nota tambe cu e Hyundai Getz Blanco cu a ocasiona e boksmento a sigui core bay for di e sitio. Mesora e polis na burger a bati alarma y a sigui e auto aki.
Na un cas na Rooi Afo panort di Faith Revival, e dama a drenta den e cura di e cas cu su auto y lo a bay paden. E polis a avisa e otro polisnan y mesora varios unidad di polis a yega na e cas aki. Nan a drenta den e cura habri y a detene e dama chauffeur.
E polisnan a pidi pa un transportwagen y esaki a presenta y a transporta e dama pa warda di polis. E Hyundai Getz blanco a wordo confisca pa mas investigacion.
