Palm Beach;
Diadomingo entre 4’or y 45 pa 5’or di mainta a drenta un informacion na polis cu na altura di Olde Molen, tin un homber cu tin un arma di candela den su poder. E homber tabata bisti na blanco. Mesora polis a bay den e area y a cuminsa busca pa e persona cu lo tin e arma di candela den su poder.
Na altura di Riu Hotel, un patruya di polis a bin topa cu un pickup F150 blanco actuando sospechoso, mesora nan a para esaki y den e auto polis a bin topa cu un persona cu tabata cuadra cu e descripcion cu nan a ricibi.
Den e pickup tabata tin como 7 persona, nan tur a wordo baha for di e auto. Varios unidad di Polis a bay na e sitio y asina a cuminsa rista un pa un di e hombernan aki, buscando e arma di candela. No a dura, un di e hombernan enberdad tabata tin un arma di candela y un otro tabata tin un arma blanco den su poder.
Tur shete a keda deteni, dos transportwagen a presenta y algun a wordo transporta den transportwagen y algun otro separa den patruya di polis. Tambe a pidi pa presencia di departamento tecnico na e sitio. E caso aki a wordo poni den man di recherche pa mas investigacion.
