“Crusada di Sero Pita ta keda un caminda peligroso, pone atencion momento cu bo ta yegando cerca y baha bo velocidad un poco”.
Sero Pita – Diasabra den oranan di merdia algo prome cu 3’or a sosode un accidente cu basta daño material ariba e crusada conoci na Sero Pita.
Habitantenan a scucha un zonido basta fuerte, unda cu mesora a pensa ariba e un accidente. Y enberdad dos auto a dal contra otro.
Tawata trata di un Mitsubishi Lancer y un flatbed truck di un compania di pest control.
E accidente a sosode momento cu e Lancer biniendo di nort pa zuid ariba e crusada a haye confronta cu e flatbed a subi su dilanti.
Aki ta unda chauffeur di e Lancer lo a trata na desvia, pero envano y dal contra e flatbed.
Ambulance cu tawata na e sitio momento cu Arubanative.com a yega a papia cu chauffeur di e Lancer, cu tawata bisa cu e la sinti su lomba.
Pero no tawata desea asistencia di Paramediconan.
Na yegada di polis di trafico a start un poco discusion entre chauffeur di e Lancer y e polis di trafico.
Polis di trafico a splik’e con e ley ta hinca den otro relaciona cu velocidad di e vehiculo momento cu bo ta yegando un crusada peligroso.
E chauffeur a keda para cu e ta ariba su caminda di preferencia, y polis di trafico tawata splica cu velocidad halto a hunga un rol, esey personal di Forensys a constata despues cu nan a midi e marca di brake.
Ambos vehiculo a sufri basta daño material y takelwagen tawata necesario pa por a move ambos for di caminda. Parti paden di Lancer a pega candela parti drechi di e dashboard, un persona cerca a basha awa ariba dje .
