Oranjestad:
Diabierna algo despues di 7’or di mainta, na momento cu Aruba henter ta rumbo pa trabou, scol of cualke un of otro diligencia. Informacion a drenta cu algun persona a dicidi di subi tera na Nikky Beach. Segun rumornan mas o menos 6 persona lo a subi tera y na careda nan lo a crusa caminda. SI esaki a sosode sigur e lo mester a hala atencion di esnan cu tabata traficando riba L.G. Smith Boulevard, e momento ey.
Den careda di 7’or y 35 Aruba Ports Authority a spot un boto Pinero ta drief den e boca di Waf. Den e boto tabata tin jerry can y life vest, e boto aki lo a trece den careda di 20 persona. E boto registra como AMMT-PE-0461, bou di e nomber Nuestra SRA. DEL VALLE I, di Las Piedras Venezuela. E tabata tin dos motor
Polis, Kustwacht y Guarda Nos Costa mesora a wordo poni na altura. Patruyanan di Oranjestad a yega prome na Nikky Beach y aki a detene un di e ilegalnan cu no lo a haya chens di crusa caya bay.
E homber a bin conta polis un stoira cu e tin algun tempo caba na Aruba y cu e no a yega riba e boto, ora a puntre unda e ta kedando, e la contesta riba caya. Ora polis a puntre unda e ta come, e la bisa polis cu e no a come, aki polis a confirma cu e no tabata bisando e berdad y e homber tabata full muha na awa di lama. Polis a detene e homber ilegal aki.
Un rato despues polis a bolbe detene un otro persona ilegal cu tambe a yega tera hunto cu e ilegal prome. E tambe a keda deteni.
Polis a bin topa cu varios pañanan muha cu a wordo laga atras banda di lama cu probablemente tabata di e ilegalnan cu lo a cambia paña prome cu nan a crusa caminda, entre nan lo mester tabata tin muher tambe cu a yega tera.
Un rato despues a mira algun movecion straño riba e rif di Renaissance Island, como 4 persona haciendo sospechoso. Polis, Kustwacht y Guarda Nos Costa no a confia esaki y a cuminsa cu un buskeda grandi cu botonan di Kustwacht, boto di polis y tambe helicopter di Kustwacht.
Polis a subi riba boto di Kustwacht y asina a bay riba Renaissance Island pa haci un buskeda intenso, aki lo a bin topa cu un ilegal pero esaki no lo a yega tera cu e boto, pero lo tin algun tempo ilegal na Aruba. E la wordo deteni, treci tera y a wordo pasa pa Guarda Nos Costa.Despues di un buskeda intenso y no a bin topa cu mas ilegal a stop e buskeda.
Aparentemente un tip lo a drenta cu e boto aki for di trempan tabata tin intencion di a drenta hopi mas pariba, pero no ta conoci kiko lo tabata e motibo cu e la keda bin mas pabou y a baha e ilegalnan te na Nikky Beach, un area cu den oranan di mainta tin basta movecion di trafico y peaton.
Di e supuesto 20 personanan cu lo a yega Aruba, dos so a wordo gara, unda e otro nan cu lo a logra subi tera y a bay, no ta conoci. Probablemente lo por tin mas ilegal cu no lo a logra yega tera y cu por a keda scondi den e mangelnan riba rif of patras di e pista di aviona, wardando te ora autoridad move, e situacion calma, nan lo landa bin tera.
