Gobierno structuralmente a escoge pa sconde e berdad di contaminacion di nos costa zuid pa Pueblo y turista cu ta landa na lama. Documentonan ta confirma esaki. Gobierno a haya su mes obliga pa mantene transparencia pa motibo di un peticion a base di e Landsverordening openbaarheid van bestuur cu mi persona a entrega dia 2 di februari 2022 cerca minister Arends. Den e carta cu a acompaña e documentonan, minister Arends ademas a priminti cu dentro di poco e ta bay publica tur e documentonan riba e website www.gobierno.aw. Pa motibo di e importancia di e documentonan aki, mi persona no kier warda riba e minister y mi ta manda e documentonan pa prensa. Aki ta sigui un relato corto pa cu e estado di nos lama y su consecuencia pa salubridad publico:
Rapport-CARMABI ta bisa cu gobierno y en particular Gisbert Boekhoudt y Robert Kock di DNM (Directie Natuur en Milieu) a colabora pa realisacion di e rapport. Pero en bes di informa Pueblo di biaha encuanto e resultadonan y comparti e rapport cu por ehempel Fundacion Parke Nacional Arikok y Comision Flora y Fauna, conseho di minister a dicidi riba dia 8 di october 2019 pa pidi 12 miyon di ATA pa drecha e RWZI di Bubali (anexo 1). Aparentemente gobierno no a haya necesario pa informa hende y entidad cu no ta representa un interes economico inmediato.
Aña pasa, ora mi a cuminsa skirbi riba nos medio ambiente y nos maneho di desperdicio tampoco gobierno a sinti necesidad pa ta honesto cu Pueblo. Deliberadamente gobierno a escoge pa keda keto, aunke DNM a adverti minister Evelyn Wever-Croes riba dia 18 di december 2020 cu mester cera cierto beach temporalmente pa motibo di awa contamina: “Stranden en zwemzones periodiek afsluiten tot dat de gehaltes aan micro-organismen een aanvaardbaar niveau bereikt hebben” (anexo 2).
Ora cu mi a publica e draft di e CARMABI-rapport riba dia 10 di januari 2022 via 24ora.com ni riba dia 11 di januari 2022 cu CARMABI mes a publica e rapport riba Facebook, gobierno a duna claridad riba e contaminacion di nos lama y e peliger cu esaki ta causa pa usuarionan di lama. Riba diabierna dia 14 di januari 2022 nos por a lesa den medionan di comunicacion con minister Ursell Arends a prefera di comparti contenido di e rapport cu AHATA demonstrando cu e unico preocupacion di gobierno ta e industria turistico. E mesun anochi ey un ciudadano a yama mi persona y 24ora.com pa raporta cu DOW a habri sluis pa manda awa contamina den lama den area turistico. Patrick Paskel, Bryan Koolman y mi persona a raporta esaki den entrevistanan cu a haya un audiencia enorme. Gobierno a drenta den panico, a manda DOW, minister Dangui Oduber y minister Ursell Arends a desmenti cu ta manda awa contamina lama. E acto aki ta motibo pa manda henter e gabinete Wever-Croes II cas, pasobra hasta minister-presidente tabata na haltura di e situacion. Nos sa esaki, pasobra DNM a conseha minister-presidente riba dia 4 di juni 2021 pa: “de toevoer van nutriënten naar zee zo snel mogelijk te verlagen en te reguleren” (anexo 3). Cu otro palabra DNM a bisa señora Evelyn Wever-Croes: “Stop di manda awa di pupu lama lo mas pronto cu ta posibel!”
Coleganan Marisol Tromp y Miguel Mansur a pidi un reunion publico riba e topico. Minister Ursell Arends a pone algun documento ter inzage durante e Openbare Vergadering nr. 16 di dia 31 di januari 2022. Por supuesto ter inzage, pa no mester divulga e contenido di e documentonan cu Pueblo. Pueblo henter por a mira con e ministernan presente y e parlamentarionan cu ta sostene gobierno a desmenti cu tin contaminacion y cu tin peliger pa salud di hende. Mientras tanto nan tur por a lesa riba e mesa tras di presidente di Staten e rapport di un Comision Multidisciplinario “Bescherming en Redding Koraalriffen”. E rapport aki a bay pa minister-president Evelyn Wever-Croes dia 23 di augustus 2021 y riba pagina 5 ta bisa cla y raspa: “RWZI, puntlozingen en run-off: gevaar voor mens en milieu”. E Comision ta sigui bisa: “Het zeewater bij de kust van Aruba vormt in zijn huidige stand, een broedplaats voor algen (turf- en blauwalgen) en microbacteriën (o.a. E. coli) en loopt hoog risico om te verkeren in ongezonde staat (plaagalgenbloei, zuurstofloos zeewater, geen koralen of vissen aanwezig).” Hasta e Comision a confirma cu e awa di lama na costa zuid no ta cumpli cu standardnan internacional y ta forma un peliger pa salud di hende: “Fecale bacteriën kwantiteiten overschrijden maximale bovengrenzen gestipuleerd door de Land-Based Sources of Pollution Protocol (Cartagena Verdrag) die een risico vormen voor de volksgezondheid” (anexo 4). Cu otro palabra: e cantidad di bacterianan di pupu den e awa di lama ta surpasa e limitenan maximo internacional y nan ta forma un peliger pa salud di hende.
Conclusion: si bo tin un herida na bo curpa, un malesa di cuero of otro condicionan cu ta hacibo vulnerabel pa infeccion, pensa dos biaha prome cu bo ta bula den awa di e costa zuid!