Hudishibana:
Diadomingo den careda di 7’or di anochi, durante patruya den e area di California Lighthouse, un patruya di polis a bin topa cu un jerry can preto basta grandi, riba beach na Westpunt, esaki a wordo haya na e ultimo beach panort di lighthouse. E tabata saca un holo fuerte di gasolin. E jerry can tabata ta kibra na banda. Tambe e agentenan policial a bin topa cu diferente botternan di awa, saconan di plastic, un par di slof, un par di sapato, dos saco di canvas mara na otro.
Mesora a pensa y a relacione cu e boto cu a drenta den oranan di marduga na altura di Rancho Curason. Rancho Curason ta keda hopi mas pariba. Mesora a cuminsa controla na e parti nort di nos costai. E polisnan a controla e costa norte, un poco panort di e Kapel di Alto Vista, polis a bin topa cu un Suzuki Vitara preto, e chauffeur tabata den compania di un dama.
Pariba di e Kapel di Alto Vista, e polisnan a mira di leu, dos lus cu tabata mustra mescos cu LED flashlight. Esaki a hala nan atencion y riba e distancia, e lusnan tabata mustra mescos cu e tabata cende paga, nan a dicidi di bay mas cerca pa controla di unda e lusnan aki ta bin. Na e barancanan hopi mas pariba di e kapel, den tur e scuridad polis a bin topa cu un Mitsubishi Lancer blauw scur y un Nissan March Creme. E dos chauffeurnan tabata tin un LED headlamp bisti na nan cabes, ambos tabata local. Nan tabata piscando y tabata tin nan cosnan di pisca cu nan. Polisnan a controla nan icejug y nan hemchinan, apart di nan cosnan di pisca nan no tabata tin nada particular den nan poder. Pa tur siguridad e polisnan a tuma tur datos di e chauffeurnan.
E jerry can preto cu a wordo confisca y a wordo poni den garashi di strandpolitiie. Centrale post a wordo poni na altura di e hayazgo.