Caya Ernesto Petronia, Oranjestad:
Diamars algo despues di 2’or di merdia a sosode un accidente frontal riba e caminda di Caya Ernesto Petronia. E accidente a sosode entre un Chevrolet Equinox y un Toyota Prado ambos chauffeur tabata homber y ambos a keda herida, den e Toyota Prado tabata tin un dama sinta na banda cu tambe cu a keda herida.
E Chevrolet Equinox tabata biniendo di panort, e la hala na su man robes y a bay dal contra e Prado cu tabata biniendo di direccion contrario. E impacto fuerte a manda e prado riba e acera banda di pariba di caminda. E chauffeur di e Equinox tabata mustra bou influencia, den e impacto e la dal su frenta y tabata sangrando.
Varios unidad di polis a presenta na e sitio, pa asina atende cu e accidente, nan a cera e caminda y a tuma nota cu e chauffeur di e Chevrolet Equinox tabata bou influencia.
Dos ambulance a presenta e paramediconan a atende cu tur tres herido y despues nan a transporta e dos heridonan cu tabata den e Toyota Prado pa Hospital. Mientras e chauffeur di e Equinox a wordo deteni pa core auto bou influencia y a ocasiona e accidente.
