Ora un persona ta integro e ta honesto, pero ora un hende ta bati riba su pecho cu e ta integro pa bira y haci lo contrario e simplemente ta un hipocrita. Gobierno a manda traha e rapport-CARMABI y a paga miles di florin p’e. Durante varios conferencia di prensa ministernan di MEP y RAIZ a pronkia cu e rapport aki. Segun nan ta nan tin medio ambiente na pecho.
Pero ora ta trata di placa e gobierno aki ta bira y haci net lo contrario. Den e caso di dragamento na Playa un biaha mas nos ta mira con gobierno ta desaroya maneho sin consulta cu stakeholders cu ta representa medio ambiente, manera Fundacion Parke Nacional Aruba. Ta crea maneho pa un Port City cu ta encera dragamento, mientras gobierno sa cu dragamento ta crea polucion marino.
Gobierno ta laga traha un rapport CARMABI pa studia e salud di nos los arecifenan di coral y ta bira crea oscuridad y falta di transparencia encuanto Port City. Dicon no ta demonstra atencion pa e efectonan di dragamento riba nos coralnan? Dicon no ta duna claridad con dragamento lo afecta luz bao awa, con dragamento lo afecta e simbiosis (cooperacion) entre coral y microorganismo? Dicon no ta reconoce cu coral no ta ekipa pa stoot af sedimento? Dicon no ta splica ki toxico lo invadi e parke marino cu ta anexo na e area cu ta draga? Asina tin hopi pregunta mas.
Atrobe gobierno ta demonstra miopia door di fiha atencion solamente riba e resultado economico a termino corto sin tene cuenta cu e impacto ambiental a largo plaso. Atrobe gobierno no ta cumpli cu su responsabilidad pa actua di un forma husto door di pone tur interes den balansa. Atrobe gobierno ta demonstra incompetencia ora cu no ta percura pa tin tur informacion relevante pa tuma un decision. Ademas ta straño con partidonan cu ta yama nan mes social-democrata cu mester tin un enfoke riba e ser humano y su medio ambiente, ta considera solamente e interes economico a corto plaso sin tene cuenta cu e impacto riba medio ambiente y riba salud publico.