Diasabra ultimo den un collegezaal di Colegio EPI yena di artista y organisacionnan cultural, social y educativo, a tuma lugar e tayer: “Introduction to grant writing”.
E tayer aki a wordo presenta door di Thaïs Franken, Gyonne Goedhoop y Tibisay Sankatsing Nava.
E tres damanan hoben aki cu tin hopi experiencia cu e topico, a comparti informacionnan sumamente valioso y practico cu esnan cu tabata presente y tambe cu esnan cu a atende via e sesion di Zoom.
Esaki tabata un iniciativa di Fundacion Go Cultura debi na e hecho cu ta existi un demanda hopi grandi serca nos artistanan y organisacionnan local no solamente pa adkeri mas informacion y conocemento tocante fondonan Hulandes y Europeo cu tin disponibel pa proyectonan cultural/artistico, social y educativo riba e islanan ABC-SSS, pero tambe pa haya mas informacion con mester presenta y skirbi un peticion pa financiamento (grant) efectivamente. E fondonan Hulandes y Europeo aki ta existi pa varios decada caba, pero di un forma of otro no ta yega nan destinacion pues riba e islanan ABC-SSS.
Ultimo tempo varios ta e artistanan, creativonan, organisacionnan cultural, social y educativo cu mas y mas a bin tende di e fondonan aki y a cuminsa haci e esfuerzo pa haya sa mas, pa educa nan mes mihor con pa yega mas facil na adkeri co-financiamento pa nan programa y proyectonan y Fundacion Go Cultura a cuminsa cu e proceso pa facilita esaki na nan pa medio di un tayer den estilo di un introduccion basico hopi cla, simpel y practico cu un y tur por a sigui y compronde.
Fundacion Go Cultura cu a wordo funda na augustus 2017 a bin ta haci un trabao estupendo no solamente door di promove e forza creativo di nos hendenan pero tambe door di continuamente crea plataforma pa nos artistanan por tin mas voz y participacion den proyectonan positivo. E fundacion tambe ta haciendo un esfuerzo grandi door di conscientisa nos comunidad di e balor y impacto di arte, cultura, creatividad y innovacion pa cu e desaroyo sostenibel di nos pais.
Na final di e tayer aki, e mayoria cu tabata presente a yena un encuesta y a comparti nan opinion cu e deseo y necesidad ta grandi pa continua cu e tipo di iniciativanan aki.
Fundacion Go Cultura ta gradici Thaïs Franken, Gyonne Goedhoop y Tibisay Sankatsing Nava cu a pone nan mes disponibel pa comparti nan conocemento y experticio y tambe pa nan habilidad di inspira y motiva esnan cu a atende e tayer valioso aki. Ta gradici tambe Prins Bernhard Cultuurfonds, New India Assurance, O4IA Architect Bureau, Teamfilms Aruba, Colegio EPI y Subway Aruba.
Ta di remarca tambe cu no solamente na Aruba a presencia e tayer aki pa medio di Zoom pero tambe esnan na Corsow, Boneiro, Saba, St. Maarten y St. Eustatius. Ta hopi cla e ora cu no ta solamente na Aruba tin e necesidad pa haya e informacion aki. Pues e tayer aki tabata hopi necesario y a resulta den un exito rotundo.
Keda pendiente pa Fundacion Go Cultura su proximo serie di tayer cu lo sigui cu e esfuerzo di empodera y aporta na desaroyo positivo di nos artistanan y organisacionnan local y den region.
Pa esnan cu ta desea di ricibi informacion continuo di programa y proyectonan di Go Cultura Foundation, manda bo informacion di contacto via [email protected] y sigui e pagina di Go Cultura riba Facebook.
