ORANJESTAD- Un grupo di 4 studiante di Universidad di Aruba di e programa Organization,
Governance and Management (OGM) conhuntamente cu ArubaDoet y FCCA lo ta organisando
un proyecto pa un bario di FCCA. E idea di e proyecto a bin dilanti bou peticion di habitantenan
di e area aki. E beheerconsulent di e bario a inventarisa cu e habitantenan ta desea pa e mucha
nan tin un lugar adecua cu nan por recrea y practica diferente deporte. E meta di e proyecto aki
ta pa trece e comunidad hunto y crea un comunidad mas uni.
Renobacion
Actualmente por hasi uzo di e cancha di basketball, sinembargo esaki no ta recomendabel pa
motibo di seguridad. E renobacion ta consisti di lo siguiente: mester drecha e vloer di e cancha
pa motibo cu tin hopi scheur y buraco, lo mester verf e vloer y marca e liñanan di basketball,
mester verf e “backboard”, tambe mester drecha e cura di e cancha cu actualmente un banda a
cai por completo y por ultimo mester haci limpiesa rond di e cancha debi cu tin hopi mata cu a
crece rond.
Contribucion
E proyecto lo tuma lugar dia 12 di Maart 2022, di 8or di mainta te 5or di atardi. Esnan cu kier
contribui na e proyecto aki por aplica libremente como voluntario riba e pagina web di
ArubaDoet cu ta www.arubadoet.com. E proyecto aki tin e nomber “Project Slam Dunk” y e ta
consisti di dos parti. E grupo di voluntarionan por participa di 8or di mainta te 12or di atardi, of di
12or di atardi te cu 5or di atardi. Sinembargo si ta interesa por participa tambe pa ambos orario.
