ORANJESTAD – Minister Dangui Oduber ta reacciona riba locual gremionan a trece dilanti den media, algun dia pasa gremionan a trece dilanti cu luna di januari 2022 tabata un luna hopi malo pa Aruba su turismo. Segun Minister Oduber esaki ta depende completamente di cua perspectiva ta mira e resultado di luna di januari 2022, e mandatario no ta di acuerdo cu e gremionan.
Minister Oduber a trece dilanti cu apesar cu Omicron a ocaciona un caida den e cantidad di turista cu ta bishita Aruba den e luna di januari y februari, tog no por bisa cu e tabata un luna malo. E mandatario ta basa su mes riba e informacion duna pa Centrale Bank caminda ta mustra cu e cifranan mensual cu cada turista ta laga atras den economia (tourism receipts) a subi den aña 2022 compara cu aña 2019. Cu otro palabra maske cu Aruba a ricibi menos turista, e turista cu tin ta gastando mas den nos economia segun Centrale Bank.
Den luna di januari Aruba a conoce un recuperacion di 79% di su turismo den comparacion cu aña 2019 cu tabata un aña record. Pa e luna di februari te cu awor a conoce un grado di recuperacion di 81% den comparacion cu aña 2019. Y esaki ta apesar di e caida den e cantidad di e turista cu a bishita Aruba na januari y februari, segun Minister Oduber.
Minister Dangui Oduber lo sigui infoma su pueblo debidamente y lo aclara cualkier ponencia cu no ta cuadra cu e realidad. E mandatario ta keda sumamente optimista di con henter e aña 2022 lo bay caminda Aruba lo bay recupera 100% di su turismo bek.